नेपाःया दकलय् न्हापांगु संकिपा ‘आमा’ संकिपाय् मां जुयाः म्हितादीम्ह चैत्यदेवी सिंह व संकिपा ख्यःया न्ह्यलुवाः पत्रकार विजयरत्न तुलाधर असंबरे लगायत स्वंगू दर्जन कलाकःमि, कासामि व उद्यमि, समाजसेवीपिन्त ‘लालीगुराँस सम्मान २०८१’ देछाउगु दु।

लालीगुराँस कृयसन मिडिया नेपाल, तेजस्वी कला केन्द्र एण्ड मिडियाया मंकाः ग्वसालय् जूगु उगु ज्याझ्वलय् सञ्चार लिसे सूचना प्रविधिमन्त्री पृथ्बी सुब्बा गुरुङ मूपाहाँ कथं झायादीगु खः। उगु ज्याझ्वलय् नेपाःया संकिपा, संगीत, खेलकुद, पत्रकारिता, ब्युटीसियन, समाजसेवी व थीथी क्षेत्रय् कार्यरत व्यक्तित्वपिन्त सम्मान याःगु खः। ज्याझ्वलय् थीथी क्षेत्रय् ज्वःमदुगु योगदान यानादीपिन्त सम्मान याःगु खः।

उगु ज्याझ्वलय् किर्तीमानी धावक एथ्लेटीस बैकुण्ठ मानन्धर, नेपाःया न्हापांगु संकिपा ‘आमा’ या नापनापं न्हापांगु रंगीन संकिपा ‘कुमारी’ म्हितादीम्ह चैत्यदेवी सिंह, चलचित्र क्षेत्रया अग्रज नायक विश्व बस्नेत, नेपाःया लोक सम्राट कुमार बस्नेत, नेपाःया न्हांपाम्ह ड्रमर देव राणापिन्त विशिष्ट सम्मान लःल्हाःगु खःसा पुलांम्ह अभिनेता व निर्देशक कमल कान्त मैनाली, वरिष्ठ संगीतकार लक्ष्मण शेष, गायक रोज मोक्तान, गायक व अभिनेता यस कुमार, वरिष्ठ मेकअप आर्टिष्ट सन्तु तामाङ, अग्रज पत्रकार बिजय रत्न तुलाधर असंबरेपिन्त विशेष सम्मान देछाःगु खः।

अथेहेतुं वरिष्ठ सिनेकःमि निर्देशक राजु केसी, अग्रज पत्रकार सानु काजी श्रेष्ठ, मोडेल सम्झना बुढाथोकी, हाँस्य कलाकार गायक राजन चौलागाइ खैराते, कलाकार प्रताप हुमागाई, युवा पत्रकार कुबेर गिरी, संगीतकार राजन राज शिवाकोटी, युवा गायिका अस्मिता अधिकारी, गायिका पूर्णकला बिसि, नव मोडेल आयुश्मा कार्की, गायक आयुस परियार, संगीतकार मदन परियार सुफ्फिक्स, सेक्साफोनिष्ट शिवराज गौतम, तेक्वाण्डो कासामि नन्दा बस्याल, भलिबल कासामि व कोच दिपक थापा, कराते कासामि ज्ञानेन्द्र कुमार श्रेष्ठ, वरिष्ठ मेकअप आर्टिष्ट अशोक रोक्का, सिनियर कस्माटोलोजिष्ट मन्दिरा खड्का हायु, युवा व्यवसायी  समाज सेवी सन्दिप महत लगायत पिन्त नं सम्मान देछाःगु खः।

लालीगुराँस कृयसन मिडिया नेपालया नायः ईन्द्र बिसुन्के बिन्दासया सभाध्याक्षताय् जूगु उगु ज्याझ्वलय् तेजस्वी कला केन्द्र एण्ड मिडियाया अध्यक्ष व ज्याझ्वःया निर्देशक सुमन कुमार श्रेष्ठं लसकुस नुगःखँ तयादीगु खः। मूपाहाँ सञ्चार व सूचना प्रविधि मन्त्री पृथ्वी सुब्बा गुरुङं राष्ट्रं यायेमाःगु ज्या स्वंगू संस्था जाना याःगु खँयात च्वछायेबहःगु खँ धकाः कयादिल । ज्याझ्वः ओजस्वी मल्टिमिडियाया नायः व ज्याझ्वःया कजि अनिल सुनामं न्ह्याकादीगु खः।

Categorized in मनोरन्जन