नेपालभाषा एकेडेमीया ग्वसालय् न्ह्यानावया च्वंगु साहित्यिक ज्याझ्वःया श्रृंखलाय् “सर्जक व सृजना” या न्हूगु श्रृंखलाय् थुगुसिइ नांजाम्ह कवि डा योगेन्द्र प्रधानयात कया ज्याझ्वः जूगु दु।

थ्व स्वया न्ह्यः जनकवि दुर्गालाल श्रेष्ठ व आख्यानकार मथुरा सायमियात कया “सर्जक व सृजना” ज्याझ्वः जुइ धुंकुगु खःसा थुगुसिइ कवि डा प्रधानाङ्गयात कया ज्याझ्वः जूगु खः। नेपालभाषा एकेडेमीया चान्सलर यज्ञरत्न शाक्यया सभाध्यक्षताय् जूगु उगु ज्याझ्वलय् एकेडेमीया प्राज्ञ दुजः त्रिरत्न शाक्यं लसकुस यानादीगु खः।

एकेडेमीया साहित्यिक कवःया कजिया नापनापं सर्जक व सृजना ज्याझ्वःया नं कजि खः। एकेडेमीया प्राज्ञ दुजः रजनीमिलां न्ह्याकादीगु उगु ज्याझ्वलय् सदस्य सचिव डा पुष्पराज राजकर्णिकार, एकेडेमीया प्राज्ञ दुजः विराट साहित्य गुथिया नायः महेन्द्र गोपाल कर्माचार्य, एकेडेमीया प्राज्ञ दुजः प्रा प्रेमशान्ति तुलाधर, सिद्दिदास प्रतिष्ठानया नरेन्द्र भक्त हाडापिन्स कवि डा प्रधानाङ्गया बारे थीथी खँ न्ह्यब्वया दीगु खः।

सांगितिक प्रस्तुति व साहित्यिक प्रस्तुति जूगु ज्याझ्वलय् इसास पाखें लसकुस म्ये न्ह्यब्वःगु खःसा रफेला महर्जन, सत्यनारायण मानन्धरपिन्स म्ये हाला न्यंकादिगु खः।

अथेहे तुं लोककवि राजभाइ जकःमि, साहित्यकार राजेन्द्र पुता, रश्मी नापित, नबिन प्रकाश श्रेष्ठ लगायतं कविता पाठ याना न्यंकादीगु उगु ज्याझ्वलय् एकेडेमीया भाइस चान्सलर मल्ल के सुन्दरया विशेष उपस्थिति दूगु खः।

Categorized in राष्ट्रिय