नेपालभाषा मिसा खलःया स्वीन्यादँ बुदिं छगु ज्याझ्वः दथुइ तःजिक हंगु दु। उगु ज्याझ्वलय् थीथी व्यक्तिपिन्त सिरपाः व सम्मान याःगु दु।

मूपाहाँ कथं नांजाःम्ह पर्यटन व्यवसायी लिसें संरक्षणविद् कर्ण शाक्यं ज्याथम्ह साहित्यकार फणीन्द्र वज्राचार्य, भाषा आयोगया दुजः मा.सुरेश मानन्धर, स्वर्ण पदक विजेता कासामि केदारश्वरमान स्थापित, थँजिम्ह आजिवन जः जलेश्वरी श्रेष्ठ व निवर्तमान नायः मंगला कारंजितयात सम्मान याःगु खः।

अथे हे कमला लुमिन नेपालभाषा हःपाः सिरपाः दाता कमला लुमिन कुमारं च्वमि भवानी तुलाधरयात व रमा–कौशल्या लुमंति सिरपाः दाता मथुरा साय्मिं सिस्टर बिकुमाया कारंजित श्रेष्ठयात लःल्हानादीगु खः। मूपाहां शाक्यं नेवाः मिसापिंके नं अथाह शक्ति सुलाच्वंगु दु धासें थः मां व जहानपाखें प्राप्त जूगु प्रेरणाया प्रशंग कनादिगु खः।

लिसें वय्कलं ७५ दँया वैंशय् थःगु व्यवसाय फुक्क काय् म्ह्याय्पिंत त्वःताः थः न्हूगु चिन्तनय् लगे जुयागु व माल धाःसा उमेर वंसां नं ज्या यायेफु धइगु प्रेरणाया खँ नं कनादिगु खः। ज्याथम्ह साहित्यकार फणीन्द्ररत्न वज्राचार्यं नेपालभाषा मिसा खलः मिसापिनि संस्था खःसां थः मिजंम्ह मनूयात नं हंगुलिं लसता प्वंकादिल ।

मिसा खलःया नायः धर्मशोभा तुलाधरया सभाध्यक्षताय् जूगु उगु ज्याझ्वलय् नेवाः देय् दबूया नायः पवित्र वज्राचार्य, श्रद्धाचारी गुरुमां, मिसा खलःया पुलांम्ह नायः सुवर्णकेशरी चित्रकारपिन्स नं नुगँ खँ तयादीगु खः।

Categorized in राष्ट्रिय