युक्रेनया राष्ट्रपति जेलेन्स्कीं रुसलिसेया युद्ध क्वचाःकेगु योजना अमेरिकाया राष्ट्रपति न्ह्यःने न्ह्यब्वइगु जूगु दु।

युक्रेनया राष्ट्रपति भोलोदिमिर जेलेन्स्कीं रुसलिसेया युद्ध क्वचायेकेगु योजना अमेरिकाया राष्ट्रपति जो बिडेनयात वार्तापाखें न्ह्यब्वयेगु धयादीगु दु।

निदँ स्वयां अप्वः ईनिसें जुयाच्वंगु युक्रेन–रुस युद्ध वार्तापाखें जक क्वचायेके फइगु दाबी यासें राष्ट्रपति जेलेन्स्कीं थःगु योजनाया बारे बिडेन व मेपिं निम्ह उम्मेदवारयात नं जानकारी बीगु धयादीगु दु।

थुकिया निंतिं जेलेन्स्कीया कथं युक्रेन बल्लाःगु स्थितिइ दयेमाः। युक्रेनं स्ववाः न्ह्यः रुसया कुस्र्क क्षेत्रय् आक्रमण याना १ हजार वर्ग किलोमिटर रुसी भूभाग कब्जा याःगु नं युद्ध क्वचायेकगु योजनाया छगू ब्व जूगु दाबी याःगु दु। तर आर्थिक व कूटनीतिक गतिविधिइ नं लिच्वः लाकीगु जूगुलिं युक्रेनयात थ्व योजनायात न्ह्यःने यंकेगुलि समस्या जूगु समाचार संस्था रोयटर्सं धाःगु दु।

रुसयात जबरजस्ती युद्ध क्वचायकेगु छुं नं योजना ताः मलायेवं आः वार्तापाखें युद्ध क्वचायकेगु योजना दूगु जेलेन्स्कीं धाःगु दु। जेलेन्स्की वइगु सेप्टेम्बरय् न्यूयोर्कय् जुइगु संयुक्त राष्ट्र संघया महासभाय् ब्वति कायेत व बिडेनलिसे नापलायेत अमेरिका वनेगु तयारी यानाच्वंगु दु।

रुसया प्रतिनिधित नं अन्तर्राष्ट्रिय शान्ति शिखर सम्मेलनय् थें महासभाय् ब्बति कायेगु निति वइगु आशा यानागु वय्कलं धयादिल। थ्वसिबें न्ह्यः स्वीट्जरल्यान्डय् कीव शान्ति वार्ताया नितिं न्हापांगु शिखर वार्ता जूगु खः।भूमि विवाद तच्वयेधुंकाः रुसं २०२२ फेब्रुअरी २४ कुन्हु युक्रेनय् आक्रमण याःगु खः।

Categorized in अन्तर्राष्ट्रिय