प्रधानमन्त्री केपी शर्मा ओलीं ‘काभा वुमन्स भलिबल नेसन्स् लिग, २०२४’ कासामिपिन्त थौ सिरपा लःल्हानादीगु दु।

प्रधानमन्त्री निवास, बालुवाटारय् थौ जुगु ज्याझ्वलय् टोलीया क्याप्टेन अरुणा शाहीनाप १४ म्ह कासामिपिन्त म्हतिं स्वंगू लखं, मुख्य प्रशिक्षक जगदीशप्रसाद भट्टयात निगु लखं, सहायक प्रशिक्षक भरत यादव, व्यवस्थापक निलमसिंह बज्राचार्य व फिजियो लोकेन्द्र कुँवरयात म्हति छगु लखं व निद्धः सिरपा लःल्हानादीगु।

वंगु साउन १७ निसे २३ गतेतक येँ जुगु कासाय् नेपाः लिउ लागु खः। मन्त्रिपरिषद् न वंगु साउन ३१ गतेया निर्णययासे कासामि व प्रशिक्षकपिन्त ४७ लाख ६० हजार सिरपा लःल्हायेगु निर्णय याःगु खः। प्रधानमन्त्री ओलीं मिसा भलिबल कासामिपिन्स आःतका दकलय् बालागु कासा म्हितुगु धका लसता प्वकादीसे वइगु दिं न थथे बालक्क म्हितिइ धइगु भलसा न कयादीगु दु।

“झि कासामि म्ह्याय्पिन्त अझ थ्व स्वया बालाक्क म्हित्यगु निति उत्साह दुगु भलसा कयागु दु।”, प्रधानमन्त्री ओलीं धयादीगु दु, “थ्व सिरपां हाकन मेगु कासा म्हित्यगु निति ताः लायेमा धका भिंतुना देछानादीगु दु। कासामिपि निरन्तर अभ्यास व प्रेरणाया वातावरण व पूर्वाधारया निति सरकारं माःगु ग्वहालि याये।छिकपि न्ह्याथाय् वंसा त्याइ धइगु तधःगु मनोबल ज्वना लिपाथ्यके झाँस।”

वयकलं थःगु पदबहालीया दिं किपूया मैदानय् स्वसः न्हि दुने बालाकेगु निर्णय यानागु खँ लुमकादीसे वयात कार्यान्वयन यायेत झीक्वःगु राष्ट्रिय खेलकुद कासा बालाक्क तयारी यायेत सम्बन्धित निकाययात इनाप यानादीगु दु। वयकलं दशरथ रंगशालाय् जुयाच्वंगु कासाय् ध्याचं हे ध्याचं जुगु दुःखया खँ जुगु व उगु रंगशालायात स्तरीयबाहेक मेमेगु कासाय् मछ्यलेत ध्यानाकर्षण यानादीगु दु।

उगु ज्याझ्वलय् युवा लिसे खेलकुदमन्त्री तेजुलाल चौधरी, खेल पदाधिकारी, प्रशिक्षक व व्यवस्थापकपिनिगु न ब्बति दुगु खः।

Categorized in कासा