प्रधानमन्त्री केपी शर्मा ओलीयात भारतीय राष्ट्रिय रक्षा महाविद्यालय (एनडीसी)या शिक्षार्थीपिनिगु प्रतिनिधिमण्डलं नापलागु दु।

प्रधानमन्त्री निवास, बालुवाटारय् नेपाल अध्ययन भ्रमणय् वयाच्वंगु पुचलं नापलागु खः। नापलायेगु झ्वलय् प्रधानमन्त्री ओलीं उगु कलेजं रक्षा मामिलाया ज्या यानाच्वंगु प्राज्ञिक योगदानयात प्रशंसा यानादीसे दक्षिण एसियाली राष्ट्र तयेगु शान्ति व समृद्धिया निति मंकाः कुतः जुइमागुलि बः बियादीगु खः।

वयकलं गौतम बुद्ध, महात्मा गान्धी थे जाःपि व्यक्तित्व जन्म जूगु दक्षिण एसियाली ख्यलय् हिंसा व विवाद जूगु धइगु संस्कृति व सभ्यताया अःखः जूगु खँ धका धयादीगु खः।

प्रधानमन्त्री ओलीं नेपाः व भारत दथुइ समान संस्कृति, नयेगु त्वनिइगु व सभ्यताया चर्चा यानादीसे निगु देय् दथुइ याःगु सम्वन्ध अझ अप्पोकेमाः धका धयादीगु खः।

नापलायेगु ज्याझ्वलय् नेपाःया लागि भारतीय राजदूत नवीन श्रीवास्तब, कलेजया प्रतिनिधि सन्दिप एस सन्दुपिनिगु ब्बति दुगु खः।

Categorized in राष्ट्रिय