श्री हल्चोक आकाश भैरव समाजया प्रारम्भिक साधारणसभा न्हूगु ज्यासना पुचः ल्यसें क्वचाल । थ्वहे वंगु भाद्र १५ गते शनिवाः हल्चोकय् जूगु साधारणसभाय् शेरबहादुर पुतुवारया नेतृत्वय् दुगु समितियात हे न्हूगु ज्यासना पुचः कथं ल्यःगु खः।

न्हूगु ज्यासना पुचलया न्वकु जीवन पुतुवार, छ्याञ्जे सुरेन्द्रभक्त श्रेष्ठ, ल्यूछ्याञ्जे शुक्र पुतुवार, दांभरिं सुन्दर पुतुवार व दुजःपिं नृपेन्द्रलाल श्रेष्ठ, अर्जुन पुतुवार, पुर्ख पुतुवार, दानकान्छा पुतुवार, सुनिता पुतुवार व लक्ष्मी पुतुवार च्वनादीगु दु। नागार्जुन नगरपालिका ३ वडाया अध्यक्ष उमेश लामाया मूपाहाँसुइ जूगु ज्याझ्वलय् हल्चोक आकाश भैरवया पुजा याना वयाच्वनादीपिं नरबहादुर पुतुवार  व थकुवा पुतुवारयात लय्पतिकं बिया वयाच्वंगु अनुदान नं ज्याझ्वलय् लःल्हाःगु खः।

न्हू ज्यासना पुचःयात समाजया सल्लाहकार रविकृष्ण श्रेष्ठयालिसें नागार्जुन नगरपालिका वडा नं. ३ या दुजःपिं बमबहादुर श्रेष्ठ व राधिका दर्नालपिसं भिंतुना देछाःगु खः। ज्याझ्वलय् समाजया संरक्षकपिं सागर पुतुवार व सुरज पुतुवारपिसं समाजया गठनं प्रशासनिक ज्याखँ न्ह्याकेत थःपिन्त ग्वाहालि जूगु खँ धयादिल। वय्कःपिसं गुठी व समाज छगू हे रथया निचाः घःचाः जूगु खँ कनादिल।

ज्याझ्वलय् नुगःखँ तयादिसें मूपाहाँ लामां वडापाखें याय्माःगु ग्वाहालि याय्त थः न्ह्याबलें तयार दुगु खँ धयादिल। वय्कलं छगू हे शीर्षकय् वडा व नगरपालिकां बजेट तय् मज्यूगु व नगरपालिकां आकाश भैरवया निंतिं बजेट फ्याना तय् धुंकूगुलिं वडापाखें बजेट मतयागु जूसां हल्चोकया म्हसीका कथं दुगु आकाश भैरवया प्याखंयात माःगु ग्वाहालि याय्गु खँ कनादिल।

ज्याझ्वलय् आर्थिक प्रतिवेदन न्ह्यब्वसें दांभरिं सुन्दर पुतुवारं थीथी संस्था व व्यक्तिपिनिपाखें समाजं न्ह्याकागु गतिविधियात तिबः बीकथं ग्वाहालि याना वयाच्वंगु खँ कनादिल। वय्कलं न्ह्यःने वयाच्वंगु हल्चोक आकाश भैरवया १२ दँया जात्रा सुथां लाक्क न्ह्याकेगु निंतिं १ करोडया कोष दय्केगु तातुनागु व थुकी सकसिनं नुगः ह्वय्काः ग्वाहालि याय्त इनाप यानादिल।

छ्याञ्जे सुरेन्द्रभक्त श्रेष्ठं न्ह्याकूगु ज्याझ्वलय् वय्कलं संस्थाया प्रगति प्रतिवेदन नं न्ह्यब्वयादीगु खः। वय्कलं हल्चोक आकाश भैरवया जात्रापर्व सुथांलाक्क न्ह्याकेत गुथियारपाखें नं थम्हं फुचाःकथं ग्वाहालि याय्त इनाप यानादिल।

Categorized in राष्ट्रिय