अमर व सरीताया “छंगु ल्यूल्यू” ज्वःम्ये पिदन
लहनान्युज | ञंलाथ्व चाैथी ११४४, भाद्र २२ शनिवाः
अमर – छंगु ल्यूल्यू वयाः फुइन बच्छि जोवन
सरीता – छंथाय् वयला कि मवयला जुल मन दोमन..
लोकंह्वाःम्ह म्येहालामि अमर चित्रकार व सरीता महर्जनया सलय् “छंगु ल्यूल्यू” ज्वःम्ये–भिडियो पिदन । ख्यालि जुजु मदनकृष्ण श्रेष्ठया मूपाहांसुइ जूगु ज्याझ्वलय् पितब्वज्या जूगु थुगु म्येय् संगीत व संगीत संयोजन भूपेन्द्र बज्राचार्ययागु खःसा म्येहालामि चित्रकारं हे थुगु म्ये च्वयादीगु थुगु ज्वःम्येया रेकर्डिङ फिरोज बज्राचार्यं यानादीगु खःसा थुगु म्ये रेकर्डिङ ज्योति म्यूजिकय् जूगु खः ।लोकगायक रत्न बेहोशी बज्राचार्यया विशेष पाहांसुइ व ललितपुर महानगरपालिका १६ अध्यक्ष निर्मलरत्न शाक्यया पाहांसुइ सिडिसी सिनेमाज्, सिटिसी मल, सुन्धाराय् जूगु थुगु ज्याझ्वः आरबी जेम एण्ड ज्वेलरी इण्डष्ट्रिज् प्रा.लि.या निर्देशक रिजु महर्जनया सभापतित्वय् जूगु खः । ज्याझ्वलय् मूपाहां ख्यालि जुजु श्रेष्ठयात म्येहालामि सरीता महर्जनं दोसल्लां न्ययेकाः, आरबी डायमण्ड ज्वेलरीया सिइओ रिकेन महर्जनं मतिनाया चिं देछाःसें हंगु खःसा म्ये व म्यूजिक भिडियो देयेकेज्याय् योगदान यानादीपिंलिसें पाहांपिन्त नं मतिनाया चिं देछाःगु खः ।
रवि सायमिं निर्देशन, कृष्णभक्त महर्जनं कोरियोग्राफी, अमर चित्रकारं छायाँकन, सम्पादन व रंग संयोजन नं यानादीगु थुगु म्येया भिडियोय् मनोज महर्जन, नेरिसा महर्जन, कृष्णभक्त महर्जन, निश्चल भुजेल, सुब्रिना चित्रकार लगायत कलाकारपिन्सं अभिनय यानादीगु दु ।
म्ये–भिडियोय् समा सनमकुमार श्रेष्ठ व विमला सापकोटां यानादीगु खःसा थुकिया पोष्ट प्रोडक्सनया भाला सुभाष काफ्लें पूवंकादीगु खः ।
थुगु म्ये स्वयेगु नितिं युट्युब लिंक –
https://www.youtube.com/watch?v=8Wx_J6RGaQU
