हनुमानध्वाखाया महाद्यः पार्वती देगः पुनर्निर्माण याय्गु ज्या ९० प्रतिशत क्वचाःगु खँ उपभोक्ता समितिया अध्यक्ष विभोरलाल श्रेष्ठं कनादीगु दु।

२०७२ सालया भुखाचं क्षति जूगु देगः दय्केगु नितिं बागमति प्रदेश भवन विभागया ग्वाहालि पुनर्निर्माण जुयाच्वंगु खँ कनादिसें वय्कलं याकनं हे ज्या क्वचाय्काः पुरातत्व विभाग अन्तर्गतया दरबार हेरचाह अड्यात लः ल्हाय्गु तयारी जुयाच्वंगु खँ नं वय्कलं कनादीगु दु।

वय्कःया कथं देगः दय्केगु नितिं बागमती प्रदेश सरकारपाखे ३ करोड ७१ लाख तकाया लागत इस्टिमेत तयार याःगु खःसा उकिया बछि ध्यबां हे देग पुनर्निर्माणया ज्याझ्वः क्वचाइगु जानकारी नं वय्कलं बियादीगु दु। वय्कःया कथं आः तक देगः पुनर्निर्माणया झ्वलय् १ करोड २ लाख तका खर्च जुइधुंकूगु दुसा थप ४० निसे ४५ लाख तका खर्च जुइगु अनुमान वय्कलं यानादीगु दु। देगः पुनर्निर्माण आः वइगु मोहनि नखः न्ह्यःने हे क्वचाय्केगु कथं थःपिसं ज्या यानाच्वनागु खःसा उपभोक्ता समितिं जिम्मा कयाः देगः पुनर्निर्माण यानागु कारणं म्हो ध्यबा देग ःदय्केगु क्वचाइगु खँ नं वय्कलं कनादीगु दु।

लिसे वय्कलं सम्पदा पुनर्निर्माण याय्गु सरकारया नीतियात हिलेमाःगु खँ धयादिसें धयादिल, ‘सरकारया दररेट छगू दु, तर बजारय् ज्या याइपिंत उलि ज्यालाः मगाः, सरकार द्वःछि व चाःगु ध्यबा न्हिं ज्याला क्वःछिनातःगु दु। तर बजारय् २४ तका ज्याला बीमाः। अथेजुयाः सरकारं सम्पदा पुनर्निर्माण सम्बन्धी गुगु मापदण्ड दु उकियात हे हिलेमाः।’

अथे हे वय्कलं सम्पदा पुनर्निर्माण याय्गु खःसा स्थानीय जनतायात हे जागरुक याय्माः धासें स्थानीय जनतां सम्पदाया महत्व गुलि थू मेपिसं उकिया महत्व मथुइगु जूगुलिं सम्पदा पुनर्निर्माण याय्बलय् स्यने फइगु आपालं सम्भावना दुगु खँ नं वय्कलं कनादिल।

उदाहरण बिसें वय्कलं धयादिल, ‘सरकारी इन्जिनियर धकाः वइ, तर उमिसं सम्पदा गुकथं निर्माण याय्गु धइगु ज्ञां तकं मदु। पुलांगु सम्पदा बारे उमिसं छुं थुयाच्वंगु दइ मखु।’

Categorized in राष्ट्रिय