स्वनिगः दुने खुसिइ मापदण्ड थप २० मिटर यायेगु सर्वोच्च अदालतया निर्देशनात्मक आदेशयात कया बागमती प्रदेशया मुख्यमन्त्री बहादुर सिंह लामायात ध्यानाकर्षण पौ लःल्हाःगु दु।

नेवाः देय् दबू स्वनिगः विशेष प्रदेशया नायः श्रीकृष्ण महर्जनं बागमती प्रदेशया राजधानी हेटौंडाय् मुख्यमन्त्री नापं मन्त्री परिषदकया कार्यालय हे वना थौं ध्यानाकर्षण पौ लःल्हानादीगु खः। ध्यानाकर्षण पतिइ खुसिया मापदण्ड अप्वयेकूगुलिं लखौं स्वनिगलय् च्वपि पीडित जुइगु खँ न्ह्यथसें सर्वोच्चया उगु फैसलायात कया न्यायीक पुनवरालोकनया नितिं माःगु कथं प्रदेश सरकारं कुतः यायेत माग यानातःगु दु।

थुकिया नितिं देय् दबूपाखें केन्द्रीय सरकारनिसें स्थानीय सरकारयात तकं कुतः यायेत इनाप याये धुंकूगु खँ न्ह्यथसें ध्यानाकर्षण पतिइ संविधानं बियातःगु नागरिकया ब्यक्तिगत सम्पत्ति तकं सुरक्षित मजुइगु अवस्था वःगुलिं इलय् हे समस्या समाधान यायेमाःगु, जनताया मागयात ध्यानय् तया प्रदेश सरकारं भूमिका म्हितेमाःगु खँ न्ह्यथनातःगु दु थुगु विषययात कया मुख्यमन्त्री लामां केन्द्रीय सरकारपाखें नं पुनवरालोकनया नितिं कुतः यानाच्वंगु खँ न्ह्यथनादिसें थःम्हं नं सहलह ब्याका माःगु कथंया कुतः याये धकाः बचं बियादीगु खः।

Categorized in राष्ट्रिय