सरकारं स्वनिगःया खुसि सिथय् छेँ दनेत गुलि जग्गा त्वःतेमाः धका २०६५ य् मापदण्ड क्वःछीधुंकूगु खः। गथे कि बागमती व विष्णुमतिया हकया खुसि सिथं २० मिटर त्वःताः छेँ वा छुं नं संरचना दय्के फइ । धोबिखोलाय् थ्व मापदण्ड ९ मिटर व नख्खुइ १२ मिटर तया तःगु दु।

अथे हे बल्खु, कर्मनासा, कोड्कु, साङ्ले व महादेव खुसिइ १० मिटर मापदण्ड तोके याःगु खः। टुकुचा, सामाखुसीइ ४ मिटर त्वःता संरचना दय्केगु मापदण्ड क्वःछिनातःगु खः। सरकारं उगु मापदण्ड क्वःछीधुंकाः अन दुगु जग्गाय् छेँ दने दइ। आः स्वनिगःया खुसि सिथय् यक्को छेँ दय्धुकल। थज्याःगु अवस्थाय् २० मिटर तक अप्वः छुं नं संरचना दयेके मफुत धाःसा अन छेँ दुपिन्त लिच्वः लाइगु जुल। छाय् धाःसा, उगु जग्गाय् येँ महानगरया सूचं पिहां वयेवं आः छु दयेके मफइगु जुल।

सर्वोच्च अदालतं स्वनिगःया दक्वं खुसि सिथय् सरकारं न्हापा क्वःछिउगु मापदण्ड स्वयां २० मिटर तक च्वय् छेँ वा संरचना दयेके मदइगु फैसला याःगु खः। आः खुसि सिथय् आःया मापदण्ड स्वयां ६५ फिट स्वयां च्वय् छुं नं संरचना दयेके दइमखु। अझ धायेगु खःसा ४० फिट फ्रन्टेज दुगु व खुसि सिथं मेगु साढे ६५ फिट ल्यं दनिगु जग्गा दुसा साढे ७ आना जग्गा स्वाहा जुइ। उगु जग्गाय् आः जग्गाधनीं छेँ दने फइमखु, न त व जग्गा मी फइ। छेँ दनेगु सम्भव मदुबलय् व जग्गा सुनां न्याइ मखु। उकथं हे २० मिटर तकया जग्गा बैंकयात बह्र तये दइ मखु। सरकारं म्हिगः क्वःछिनातःगु मापदण्ड कथं खुसि सिथय् च्वंगु जग्गा न्याःपिं वा पुर्खाया जग्गाय् च्वनाच्वंपिं अदालतया निर्णयं अन्याय जूगु दु।

राज्यं नागरिकया स्वंगू मू जिम्मेवारी दु — वयागु जीवनया रक्षा यायेगु, वयागु सम्पत्तिया रक्षा यायेगु व वयागु अधिकारया रक्षा यायेगु। थ्व दायित्वं न अदालत न संघीय सरकारं बचे जुइ फइ, न स्थानीय सरकार। सुं नं बिस्युं वने फइमखु। सर्वोच्च अदालतया अन्यायपूर्ण फैसलायात आः जनतां याःगु विरोध स्वाभाविक हे खः । थुकिया अध्ययन यायेत सरकारं कार्यदल नं गठन याःगु दु। अथेहे येँ महानगरया मेयर बालेन शाहं अदालतया निर्णय कार्यान्वयन यायेत अडान काःगु दु। क्वःछिनातःगु मापदण्ड स्वयां २० मिटर दुने गुगुं नं संरचना दयेके मदइगु सुचं जारी याःगु दु।

वय्कलं थज्याःगु सुचं जारी यायेन्ह्यः महानगरया सुं नं निर्वाचित प्रतिनिधिलिसे सल्लाह याःगु मदु। महानगरया कार्यकारी बैठकय् उपमेयर सुनिता डंगोलं बालेन शाहयात छखे तयाः न्ह्यसः तःगु खः –चीधंगु खँ तकं कार्यपालिकाय् चर्चा जूगु खः। अय् सां थ्व महत्वं जाःगु खँय् जिपिं नाप छाय् सहलह मयाना? याकःचां गथे यानाः जानकारी कयादिया? अदालतया निर्णयं येँया जनतायात तःधंगु लिच्वः लाकूगु दु, उमिसं विरोध यानाच्वंगु दु। थ्व निर्णयया विरुद्ध जिपिं संशोधनया निंतिं अदालतय् वनेफुगु खः। थुकिया निंतिं छाय् सल्लाह मकायेगु ? लिसें वय्कलं अदालतया फुक्क निर्णय जनताया पक्षय् मजुइफुगु नं धयादीगु दु।

जनप्रतिनिधिं जनप्रति जिम्मेवार जुयाः कानूनी समाधान मालेमाः। थज्याःगु संवेदनशील विषयस बोर्ड बैठक मतसे मेयर स्तरया निर्णयपाखें जानकारी कायेगु बांलाःगु मखु। तर जिम्मेवारी कायेत मेयर तयार मदु। बालेनया मू चरित्र धयागु गुलि नं तःधंगु गल्ती याःसां स्वीकार मयायेगु खः।