नेपाल पत्रकार महासंघया चुनाव थ्वहे वइगु असोज १२ गते जूगु दु। असोज ५ गते चुनाव याय्गु धका सुचः पिहावंगुलि महासंघया नायः विपुल पोखरेलं केन्द्रीय नायः पदं राजीनामा बिइवं अनिश्चित जूवंगु खः ।

स्वक्वः तक तिथि घोषण यानाः नं महाधिवेशन याय्मफयेवं पोखरेलं पदं राजीनामा बिउगु खः । बरिष्ठ उपाध्यक्ष रमेश विष्टयात राजीनामा पौ लःल्हाय्गु झ्वलय् पोखरेलं महासंघया कार्यकारी नेतृत्व नं विष्टयात ब्यूगु खः । महासंघया नायःया राजीनामा बीमाःगुया ल्यूने सदस्यता सम्बन्धी विवाद मू कारण खः।

अले सदस्यता विवाद स्पष्ट रुपं राजनीतिक पार्टीलिसे स्वानाच्वंगु दु। लोकतान्त्रिक अभ्यास कायम जुयाच्वंगु देशय् पत्रकार संगठन दय्केगु नितिं दल सतिगु पत्रकार दइगु स्वभाविक खः। नेपाःया राजनीतिक व नागरिक अधिकारया संघर्षय् पत्रकार संगठनया महत्वपूर्ण भूमिका दु। राणा व जुजुया निरंकुशता विरुद्ध नागरिक अधिकारया संघर्षय् पत्रकार संगठनत न्ह्यःने वय्गु याः।

तर अधिकार उपभोगया इलय् गौरवपूर्ण इतिहास दुगु सामाजिक संस्थायात बदनाम याय्गु ज्या बांलाःगु धाःसा पक्का नं मखु । आः पत्रकार महासंघय् जुयाच्वंगु राजनीति धाःसा गर्वया इतिहास दुगु नेपाल पत्रकार महासंघय् चरम राजनीति खः । थुकिइ नेपाली कांग्रेस, नेकपा एमाले, माओवादी केन्द्र लिक्क लाःगु पत्रकार संगठनय् आवद्ध दु। तर मूल रुपं थुपिं पार्टीतय्सं नेतृत्वयात लय्ताय्केगु नितिं महासंघयात अति राजनीतिकरण यानाच्वंगु दु।

सत्ता राजनीतिया स्पष्ट फोटोकपी महासंघय् खनेदु । सत्ता समीकरण हिलेवं नेपाल पत्रकार महासंघय् लिच्वः लाःगु दु। तर शक्ति समीकरण निरन्तर रुपं हिलाच्वनीगुलिं महासंघं महाधिवेशन याय्मफइगु अवस्था ब्वलंगु खः। थुकिं यानाः नेपाःयाः पत्रकारिता प्रतिया विश्वास म्हो जुइगु पक्का दु। छाय्धाःसा महासंघ नेपाःया सकल पत्रकारतय् कूसा संगठन खः। व हे संगठनयात कयाः चरम राजनीति जूगु दु अले अधिवेशन याय्मफयाः नायः नं राजीनामा बीमाःगु अवस्था ब्वलंगु दु। थ्व तसकं बिडम्बनाया खँ खः।

पत्रकारतय्त छप्पँ छधी याय्त न्ह्याःवनेमाःगु संगठन राजनीति याय्गुलि न्ह्यचिला च्वंगु पक्का नं बांलाःगु खँ मखु। पत्रकारतय्त संगठीत याय्गु स्वयां नं थःगु पार्टीया दुजःतय्त संगठनय् दुकयाः संगठन कब्जा याय्गु स्वयेगु गलत संस्कारं पत्रकार संगठनयात भिं याइ मखु ।