थौ बैंकिङ समूह अप्पो थहावःगुलि सेयर बजाः निगुगु ल्याखं थहावंगु दु। नेप्से परिसूचक थौ ११.५८ ख्याखं थहावना २५८८ कायम जूगु दु।

बजाः थहावंसा कारोबार रकम छु भचा म्हो जूगु दु। वंगु दिं ५ अर्ब ६६ करोडया कारोबार जूगुलि थौ ५ अर्ब ९ करोड जक जूगु दु। बजाः चाःगु न्यागू मिनेटय् नेप्से २६४२ ल्याः थ्यःगु खः।

अथेहे न्हिनय् २ बजे लिपा २५७० थ्यःगु खः। वया लिपा बजाः भचा सुधार जूगु खः। १३८ गु कम्पनीया भाः थहावःगुलि ९४ गु कम्पनीया भाः कुहावःगु दु सा १२ गु कम्पनी स्थिर जूगु दु। बैंकिङय् दकलय् अप्पो १.०१ प्रतिशत थहावःगु दु। बजाः पूँजीकरणया आधारय् थुगु समूह दकलय् अप्पो शक्तिशाली जूगु दु सा समग्र परिसूचकयात हे यक्को प्रभाव याउगु दु।

विकास बैंक ०.६६, हाइड्रोपावर ०.३१, लगानी ०.६२, जीवन बीमा ०.२४, निर्जीवन बीमा ०.४७, मेमेगु ०.४१ व व्यापार ०.०७ प्रतिशत थहावःगु दु। माइक्रोफाइनान्स ०.१८, उत्पादन ०.१९, होटल व पर्यटन ०.६१ व फाइनान्स समूह ०.१७ प्रतिशत कुहावःगु दु। इस्टर्न हाइड्रोपावर, आत्मनिर्भर लघुवित्त व अपर स्याङ्गे हाइड्रोपावरया भाः १० प्रतिशत थहावःगु दु।

सयपत्रि हाइड्रोपावरया ८.३, स्टान्डर्ड चार्टड बैंक ३.९७, मध्यभोटेकोशी ३.८ प्रतिशत भाः थहावःगु दु। रावा इनर्जीया भाः ८.६ प्रतिशत कुहावःगु दु सा स्वरोजगार लघुवित्तया भाः ७.४ व साहस ऊर्जाया ४.२ प्रतिशतं कुहावःगु दु।

कारोबार रकमया आधारय् सीईडीबी हाइड्रोपावर, एनएलजी इन्स्योरेन्स, हिमालयन रिइन्स्योरेन्स, नेपाल फाइनान्स व एनआरएन इन्फ्रास्ट्रक्चर न्ह्यने खने  दु।

Categorized in राष्ट्रिय