नेपालभाषा एकेडेमीया निंतिं अनक मिडियाया न्ह्यब्वया कथं न्ह्यानावया च्वंगु नेवाःएफ एमया जि नं म्ये हाले सः ज्याझ्वः २५० ब्व पूवंगु लसताय् किपूया किर्तिपुर सिनेप्लेक्स हलय् छगू लसता ज्याझ्वः याःगु दु।

उगु हे ज्याझ्वलय् जि नं म्ये हाले सः रेडियो ज्याझ्वःया न्ह्याकामि व म्ये हालामि गंगादेवी महर्जन व ख्यालिजुजु मदन कृष्ण श्रेष्ठं हालादीगु ज्वः म्ये “कतांमरिया रुप छंगु” या म्ये प्याखं पितब्वज्याया नापनापं म्येहालामि गंगादेवी महर्जनया “कतांमरि” म्येचाः नं उलेज्या जूगु खः। 

ज्याझ्वःया सभाध्यक्ष अनक मिडियाया नायः नबिन महर्जनं लसकुस यानादीगु खःसा नेवाः एफएमया प्रबन्ध निर्देेशक सन्चारकःमि श्रीकृष्ण महर्जन, स्टेशन इन्चार्ज बीरेन्द्र शाक्य व गंगादेवी महर्जन लगायतं जि नं म्ये हाले सः ज्याझ्वः व नेवाः एफएमया बारे थीथी खँ तयादिगु खः। ज्याझ्वलय् विशिष्ट पाहाँपिं ख्यालिजुजु मदनकृष्ण श्रेष्ठ, रत्न बेहोशी बज्राचार्य व जुजुकाजि रन्जित, लोककवि राजभाइ जकःमि, बरिष्ठ सिनेपत्रकार विजयरत्न असंबरे, संगीतकःमि जुगल डंगोल व अनक मिडियाया नबिन महर्जन पिन्सं मंकाः कथं “कतामरी” म्येचाया पितब्वज्या यानादीगु खः।

उगु म्युजिक भिडियोयात कया पाहाँपिं असंबरे व जुगल डंगोल थःगु नुँगः खँ तयादीगु दु। रवि सायमिं निर्देशन यानादीगु “कतांमरीया रुप छंगु” म्ये नं पितब्वज्या जूगु खः। सुदित श्रेष्ठ व राष्ट्रिका शाक्यं म्हितादीगु उगु भिडियोया किपालुमि रोमन मार्स, हुलाप्याखं स्यनामि कृष्णभक्त महर्जन, लय् चिनामि व बाजं ग्वसामि जुगल डंगोल, म्येच्वमि संघरत्न शाक्य, सम्पादन निर्देेशक रवि सायमिं यानादीगु खःसा महेश महर्जनं निर्माण यानादीगु खः।

Categorized in मनोरन्जन