थौं झीगु निति लसता व उत्सवया दिं खः। नेपाःयामिडियाय् नियमनकारी निकाय प्रेस काउन्सिलनेपालया ५५ क्वःगु वार्षिकोत्सवयात तःजिक हनेगु निति झीपि ब्बति कयाच्वनागु दु।

थज्यागु सम्मानित व विशाल सभाय् ज्याझ्वः याय्दया झीपि तसकं लसतां भय्बिया च्वनागु दु ।नेपाःया मिडिया ख्यलय् मर्यादित, सन्तुलित व विश्वसनीय दयकेगु निति प्रेस काउन्सिल नेपालं थःगु ज्या बालाक्क न्ह्याकाच्वनागु दु। झीसं सिउ, अर्थतन्त्र कुहां वनाच्वंगु दु, उकिया प्रभाव मेमेगु ख्यलय् थें मिडिया नं लानाच्वंगु दु।

छापा माध्यम ला संकटय् हे दु।गुलि न्हिपौ, वाःपौ व लय्पौ बन्द जुइ धुंकूगु दु। गुलिं न्हूगु रणनीति नापं न्ह्यानाच्वंगु दु। अज्यागु संकटया दथुइ न नेपाःया मिडियां देय्या हितय्, जनताया पक्षय् व समृद्धिया पक्षय् फुसा मफुसा ज्या यानाच्वंगु दु। थ्व बालागु पक्ष खः। अनलाइन नाप डिजिटल मिडिया यक्व ब्बति दुगुलि परम्परागत मिडिया कथं न्ह्यानाच्वंगु रेडियो, टिभि व पत्रपत्रिकायात गम्भीर समीक्षा याय्त बाध्य याःगु दु।आः झीसं आर्टिफिसियल इन्टिलिजेन्स (एआई) या  प्रभाव दुहां वयेधुकुगु दु। झीसं मालेगु बुखँ, वयागु भाषा, शैली एआई प्रविधिपाखे लुइगु अले झीपि पत्रकारिताया पुलागु हे लँय् वना च्वनिइगु खःसा सुधार गय् यानाः जुइ, गम्भीर न्ह्यसः खः।

ल्हातय् ल्हातय् दुगु मोबाइल व सामाजिक सञ्जालयात छ््यला जिज्ञासा तयेगु, न्ह्यसः ल्ह्वनेगु सकसिया फइगु अवस्थाय् दु। पत्रकारं न्ह्यसः ल्ह्वनेगु न्हापाया थें आःया ई मखय् धुकल। आः पत्रकारं बालाक्क मालेगु, अध्ययन यान विकल्प बियाः न्ह्यसः तय्गु अवस्था वःगु दु।पत्रकारिता दुने सृजनात्मकताया अप्वया वःगु दु। न्ह्यसः तय्गु जक मखु समाधानया विकल्प बिइ फुसा जक पत्रकारिता रचनात्मक जुइ फइ। वहे कारण प्रेस काउन्सिलं लिपागु इलय् समाधनया विकल्प नाप रचनात्मक पत्रकारितायात देय्न्यंक अभियानया कथं न्ह्याकूगु दु।

झीसं छुं न्हूगु ज्या न्ह्याकागु खँ थ्व गरिमामय सभाय् न्ह्यथने दयाः लय्ताः। नेपाःया मिडियाया समाचार कक्षय् रचनात्मक पत्रकारिताया बहस झीसं न्ह्याकागु दु। युट्युवयात व्यवस्थित याय्त मापदण्ड दय्काः अनुगमन व कारवाही यानागु दु। युट्युवया माध्यमयात थीथी ब्वय् ब्वथलाः आचार संहिता दुने हय्गु ज्या सम्भवतः दक्षिण एशियाय् न्हापांखुसी जूगु दु। ज्वःलाक नां तयाः अनलाइन चाय्केगु व बदमासी याइगु प्रवृत्तियात पूणतः पनेगु ज्या जूगु दु। नेपाली मिडियाया प्रिन्टनिसे लिपांगु डिजिटल मिडिया तकया गहन अध्ययन यानाः दस्तावेज तयार याय्गु ज्या जुयाच्वंगु दु।

पत्रकारिताया फुक्कं विधाया अध्ययन यानाः कःघाय्गु ज्या जूगु नेपालय् न्हापांखुसी थ्व सफू जुइ। थुगु सोध व अनुसन्धानय् दुथ्याःपिं गुलिखें ख्वाःपाः जिं थौं थ्व हलय् खनागु दु। वय्कःपिं सकसितं जिं नमन यानाच्वना।उकथं हे देय्या फुक्कं प्रदेशय् वनाः नेपाःया मिडियाया वर्तमान अवस्था बारे अनुगमन सम्बन्धी दस्तावेज नं तयार जूगु दु, गन जनमानसया मिडिया प्रतिया दृष्टिकोण, पत्रकार सु खः व सु मखु धइगु थेंज्याःगु लिसः दुथ्याकागु दु। उकथं हे सञ्चारग्रामय् नेपालय् न्हापांखुसी दुहां वःगु गिद्धे प्रेस निसे फुक्कं कथंया छापाखाना सामाग्रीया संग्रह याय्गु नितिं स्वदँ न्ह्यः हे राष्ट्रिय प्रेस संग्राहलय स्थापना जूगु दु।

उकियात ठोस आकार बीत माक्वः स्रोत साधनया नितिं नेपाल सरकारं ग्वाहालि याय्माः।इतिहासया थीथी कालखण्डय् जूगु मुद्रणयात छगू हे थासय् तय्गु अवधारण सहितया संग्राहलय नं विश्वया नितिं नमुना जुइ। थुकियात पूवंकेगु मुक्कं देय्या नितिं गर्वया खँ जुइ। जिं माननीय मन्त्रीज्यूयात थुखेपाखे ध्यानाकर्षण यानाच्वना। थीथी गुंगू मातृभाषाय् पत्रकार आचार संहिता पिथनाः प्रचारप्रसार यानागु दु। दछियंकं मिडिया क्षेत्रया गतिविधि व समिक्षा सहितया अंग्रेजी प्रकाशन ‘एअर बुक’ नियमित पिदनाच्वंगु दु। थुकिया प्यक्वःगु संस्करण थौं हे महामहिम ज्यूपाखे सार्वजनिक जुइत्यंगु दु।

पत्रकारितायात थप प्रभावकारी दय्केत मिडिया साक्षरता अप्वय्केमाः व उकियात सरकारं प्राथमिकताय् तयेमाःगु सुझाव नं झीसं बियाच्वना । मिडिया जगत गुलि सुधार जुल धइगु न्ह्यसःया लिसे थ्व ज्याया नितिं सरकारं गुलि तिबः बियाच्वन धइगु तकं स्वय्माःगु अवस्था दु।थौं थुगु ज्याझ्वलय् नेपाःया मुक्कं पत्रकारिता खनेदुगु अनुभूति जूगु दुु। डोटीया अरुण बम, रुकुम पश्चिमया प्रविर ददेल निसें लमजुंगया आशा गुरुंग, बाजुराया संगिता तिमिल्सिना, सप्तरीया श्रवण देव निसें भोजपुरया ध्रुव सुवेदी तक। कालिकोटया भरत विष्ट निसें जाजरकोटया राजेन्द्र कार्की तक। अथे धइगु थन विविधतायुक्त व समावेशी नेपाःया पत्रकारिताया ख्वाःपा खनाच्वनागु दु।

वार्षिकोत्सवया अवसरय् सम्मानित व पुरस्कृत सकसितं बधाई बियाच्वना। काउन्सिलया संस्थापक अध्यक्ष सुरेन्द्रबहादुर बस्नेत लिसे फुक्कं पुलांपिं अध्यक्षतय्त जिं विशेष रुपय् लुमंकाच्वना। अन्तय् नकारात्मक व ब्वःबीगु संस्कृति मखु, रचनात्मक व सहकार्यया विकासय् न्ह्याय्बलय् जक देय् लसतां जाइ। पत्रकारित च्वन्ह्याइ। पत्रकारिता बल्लात धाःसा देशय् दुगु अस्थिरता चीकेत तिबः दइ। थुकिं जनताया ख्वालय् न्हिलासु हय्फइ।

Categorized in राष्ट्रिय