प्रधानमन्त्री केपी शर्मा ओलीें संयुक्त राष्ट्रसङ्घया ७९ क्वःगु महासभाय् सम्बोधन यानादीसे राष्ट्रसङ्घीय शान्ति अभियानय् सेना व प्रहरीया दकलय् अप्पो तधःगु योगदानकर्ता याःगु कथं नेपाः विश्व शान्ति व सुरक्षाय् थःपिनिगु योगदानयात अप्पो यायेगु तयार दु धका धयादीगु दु।

वयकं धयादीगु दु सुयात न लिउने मलाकूसे वर्तमान व भावी पुस्ताया निति शान्ति, दिगो विकास व मानव मर्यादाया उन्नति यायेगु निति छप्प जुइत विश्व समुदाययात इनाप यानादीगु खः। सशस्त्र द्वन्द्वलिपा नेपाःया शान्ति स्थापना यायेगु कुतः च्वय् क्वय् जूगु व्याख्या यानादीसे प्रधानमन्त्री ओलीं थःगु नेतृत्वया सरकारं सङ्क्रमणकालीन न्यायसम्बन्धी कानुनयात संसदं नकतिनि हे पारित यानागु धका महासभाय् धयादीगु खः।

‘निगु तधःगु राजनीतिक दलया सहकार्ययय् दयकागु वर्तमान सरकार नेपाःया जनता याःगु समावेशी व समतामूलक समृद्धिया निति आर्थिक रुपान्तरणय् न्ह्याः वसें स्थायित्व कायम यायेगु कटिबद्ध दु’, प्रधानमन्त्री ओलीं धयादीगु दु, पारस्परिक सम्मान, सार्वभौम समानता, क्षेत्रीय अखण्डता, छम्ह मेम्हनाप आन्तरिक मामिलाय् हस्तक्षेप व शान्तिपूर्ण सहअस्तित्वया सिद्धान्तय् च्वना जलाखला नाप व मेपि देय् नाप घनिष्ठ, सौहार्दपूर्ण व रचनात्मक सम्बन्धयात अझ बालाकेगु नेपाःया प्रतिबद्ध दु।’

इजरायल–प्यालेस्टाइन द्वन्द्वय् निगु देय् दथुइ शान्तिपूर्ण सम्वादपाखे समाधान जुइमाःगुलि प्रधानमन्त्री ओलीं बःबियादीगु दु। प्रधानमन्त्री ओलीं विश्वय् विकसित देशया कार्बन उत्सर्जनपाखे नेपाः प्रभावित जुइमाःगु दु व जलवायु न्यायया फाइदा नेपाःयात बिइमाःगु माग यानादीगु खः।

Categorized in राष्ट्रिय