मदिक्क वा वया ख्वपय् छेँय् छेँय् लः दुहावंगु  दु।खुसि बा वया चलः वया न्याम्ह मनू तंगु दु। जिल्ला प्रहरी परिसर ख्वपया प्रवक्ता मोहनमणि अधिकारीया कथं थिमी चलः वया प्यम्ह मनू व आशापुरीइ खुसि बा वया छम्ह मनू तंगु दु।

उमिगु नां सिइ दुगु मदुसा मालेगु ज्या जुयाच्वंगु दु। मनोहरा, हनुमन्ते घट्टे खुसिइ बा वंगुलि सतक व बस्ती तक लः दुहावया  जनजीवन अस्तव्यस्त जूगु दु। घट्टे खुसिया ताँ न त्वःधुगु दु।

ख्वपया सिद्धी स्मृति अस्पताल, जगाती, इवामुरी अस्पताल, सल्लाघारी, महेश्वरी खेल मैदान, राम मन्दिर, राधेराधे नाप यक्को थासय् लः मुनाच्वंगु दु।

जिल्ला प्रहरी परिसर ख्वपया प्रवक्ता मोहनमणि अधिकारीं डुंगा छ्यला जगातीपाखें करिब ५० म्हेसित उद्धार याःगु दु धका जानकारी बिउगु दु।नेपाली सेना, प्रहरी, ख्वप नगरपालिकाया जनप्रतिनिधितय्स उद्धार यायेगु ज्या यानाच्वंगु दु।

Categorized in राष्ट्रिय