येँ महानगर १८ वडाया अध्यक्ष न्हुछेकाजी महर्जनया च्वसाय् प्यपु म्येया म्यूजिक भिडियो कन्ह्यः शुक्रवाः असोज १८ गते नेपाः ब्याङ्क्वेटय् छगु ज्याझ्वः दथुइ पितब्वज्या याइगु जूगु दु।

महर्जनया च्वसां पिज्वःगु नेपालभाषाया म्ये मतिनाया सर्गतय्, गुँया कापिं हायाच्वंगु, छंगु मतिना व मांया यःम्ह मचा यानाः प्यपु म्येया म्यूजिक भिडियो पितब्वज्या यानादीत्यंगु खः। येँ मनपा १८ वडाया ग्वसालय् जुइगु पितब्वज्या ज्याझ्वलय् थीथी सांस्कृतिक न्ह्यब्वया नं दइगु ग्वसाः खलकं जानकारी ब्यूगु दु।

पितब्वज्या जुइत्यःगु म्ये मध्ये मतिनाया सर्गतय् म्येय् रोजी डंगोल श्रेष्ठया सः व मनराजा नकःमिया लय् दुसा थुगु म्ये स्ट्रिङ् रिकर्डिङ्ग स्टूडियोस हरि शरण साय्मिं रेकर्ड यानादीगु खः। थुगु म्येय् विनोद कुमरा भुजेलया बाजं ग्वसाः न्यने दइ। म्येया म्यूजिक भिडियोया निर्देशन व कोरियोग्राफी सुरज नापितं यानादीगु खः।

थुगु म्यूजिक भिडियोय् अनुज शाक्य व हस्ना महर्जनया मू अभिनय खनेदइ। म्यूजिक भिडियोया छायांकन व सम्पादन सोहन मानन्धर यानादीगु खः।अथेहे गुँया कापिं हायाच्वंगु म्येय् संजिप प्रधानया सः व अनिल तुलाधरया लय् व बाजं ग्वसाः दुसा थुगु म्ये अन्नपूर्ण स्टूडियो रेकर्ड याःगु खः। म्येया म्यूजिक भिडियोया निर्देशन पवन जोशीं यानादीगु खः। थुगु म्यूजिक भिडियोय् च्वमि महर्जन व सपना डंगोलया मू अभिनय खनेदइ। छायांकन व सम्पादन सोहन मानन्धरं यानादीगुलि कोरियोग्राफ सुरज नापित व ् मीरा डंगोलं समाः याकादीगु खः। म्येय् सरस्वती मानन्धरया आलाप नं न्यने दइ।

छंगु मतिना म्येय ज्वःम्येय् कथं दु। थुगु म्येय् सानु बाबु महर्जन व निशा देशारया सलय् म्येया म्यूजिक भिडियोया निर्देशन पवन जोशीं यानादीगु खः। म्येया च्वमि महर्जन व रूक्साना महर्जनया मू अभिनय यानादीगु खःसा छायांकन व सम्पादन सोहन मानन्धरं यानादीगु खःसा महर्जनं सहनिर्देशक यानादीगु खः।

मांया यःम्ह मचा म्येय् किशोर कुमार शाही व सुद्ध लक्ष्मी श्रेष्ठया सः व अनिल तुलाधरया लय् व बाजं ग्वसाः ग्वयादीगु खःसा म्यूजिक भिडियोया निर्देशन च्वमि महर्जनं यानादीगुलि म्यूजिक भिडियोया छायांकन विजय सिंहं व सोहन मानन्धरं सम्पादन यानादीगु दु । म्यूजिक भिडियोय् नरेन्द्र डंगोल, नानी मय्जु डंगोल, निरज डंगोल, अल्का डंगोल, निजल डंगोलं विशेष ग्वाहालि यानादीगु खः।

Categorized in मनोरन्जन