राष्ट्रिय समाचार समिति (रासस) पाखें म्हिगः निसे नेपाल व मैथिली भाषाया समाचार सेवा शुभारम्भ जूगु दु । भद्रकाली प्लाजाय् च्वंगु राससया मू ज्याकुथिइ छगू ज्याझ्वःया दथुइ सञ्चार व सूचना प्रविधिमन्त्री पृथ्वी सुब्बा गुरुङं निगुलिं माँभाय् समाचार सेवाया उलेज्या यानादीगु खः।

राससयात समावेशी चरित्र कथं दयेका यंकेगु ताःतुना वंगु कौलाथ्व १३ निसें निगुलिं मां भाय्या समाचार सेवा परीक्षण कथं न्ह्याकावया च्वंगु खः। राससया कार्यकारी नायः धर्मेन्द्र झा नं संविधानया भावना कथं राससयात समावेशी दयेकेगु आज्जुयात नाला थप निगू मां भाय्या समाचार सेवा न्ह्याकूगु खः धका धयादिल।

“राज्यया लगानी दूगु राससपाखें सार्वजनिक च्यूताःया सूचं व जानकारीत आम नागरिकया निंति उमिगु हे भासं थुइका कायेगु अधिकार सुनिश्चित जुइमाः धइगु जिमिगु मनसुवा खः,” नायः झा नं धयादिल । राससं नेपाःया संविधान–२०७२ या मर्मकथं संघीयता व समावेशी अवधारणायात कय्च्यासें २०८० पुस २३ गतेनिसें अवधी भाय्या समाचार सेवा न्ह्याकूगु खः।

उगु सेवा नेपालगञ्ज उपमहानगरपालिकलिसेंया सहकार्यय् न्ह्यागु खः । उकथं हे सञ्चार व सूचना प्रविधि मन्त्रालयया ग्वाहालिइ राससं थप निगू माँ भाय्या सेवा नं न्ह्याकूगु खः । राससया सेवाग्राहीतय् मागया सम्बोधन, समाचार सेवाया विस्तार व विविधीकरणया लिसें अन्तर्राष्ट्रिय सञ्चार माध्यमया ज्वःलिंज्वः थःत थःनेगु कुतःलय् रासस वंगु भदौ १७ गतेनिसें चां न्हिं मदिक्क समाचार सेवा पित बिइधुंकूगु दु ।

राससं थःगु स्थापनाकाल थुखे बुखँ उत्पादन यायेत छ्यःगु ज्याभः व उपकरण संग्रह याना वंगु साउन ३२ गते रासस मिडिया संग्रहालय पलिस्था यायेधुंकुगु दु ।राससया महाप्रबन्धक सिद्धराज राई नं धयादिल – “देय्या नेपाली धुंका अप्वः जनतां ल्हाइगु मैथिली व नेपाल भाषा जूगुलिं संघीय राजधानीयात आधार मानेयाना निगुलिं मां भाय्या समाचार सेवा ह्याकागु खः ।” राससया वरिष्ठ कार्यकारी व्यवस्थापकया कथं निगुलि मां भाय्या समाचार सेवाया प्रारम्भ विविधताया दथुइ एकता मालेगुु व राससयात पूर्ण समावेशी दयेका यंकेगु छगू कुतः खः ।

Categorized in राष्ट्रिय