नेपाल रेडक्रस सोसाइटीइ ५२ दुजःया केन्द्रीय कार्यसमिति नीस्वंगु दु। थ्व हे कौलागा प्रतिपदाकुन्हु च्वंगु केन्द्रीय कार्यसमितिया बैठकं थुगु कार्यसमितिइ मू न्वकूनापं १७ म्ह दुजःत ल्ययेगु ज्या जुल।

बैठकं मू न्वकू कथं चन्द्रकला कार्कीनापं मेपिं दुजःत ल्यःगु खँ सोसाइटीया महामन्त्री भूपतिलाल श्रेष्ठं धयादिगु दु। थ्व स्वयां न्ह्यः नेपाल रेडक्रसय् ३५ म्ह दुजःया कार्यसमिति दयेकेगु यानातःगु खः। बैठकं आः वइगु मङ्सिर २६ र २७ गते विधान महाधिवेशन आह्वाननाप याःगु दु।

नेपाल रेडक्रसयात अझ छप्प छधी यायेगु कुतःयात विधान अधिवेशनपाखें व्यवस्थित यायेगु महामन्त्री श्रेष्ठया धापू दु। विधान महाधिवेशनपाखें निर्वाचन यानाः आः खनेदुगु मतभेदयात मदयेकेगु निगुलिं पक्षतय् दथुइ सहमति जूगु खँ वय्कलं कनादिल संस्थायात भिंकेगु, संस्थाय् यक्व न्ह्यःनिसें जुयाच्वंगु विवादयात ज्यंकेया लागि व सामूहिक प्रतिबद्धतानापंया भिंकेगु ज्यात न्ह्याकेगु बैठकया निर्णय दु।

नायः प्रा सुदर्शनप्रसाद नेपालजुं फुक्क सरोकारवालालिसेया न्हिंन्हिंसिया खँल्हाबल्हा व सहमतियात निरन्तरता बियाः वैधानिक व दीर्घकालीन रूपं समस्या समाधान यायेत आःया कार्यसमिति प्रतिबद्ध जूगु खँ स्पष्ट यानादिल।आःया कार्यसमितिया विपक्षय् च्वंपिंसं केन्द्रीय कार्यसमितिया गठन, निर्वाचन व थ्वलिसे सम्बन्धित अदालतय् विचाराधीन मुद्दा लितकायेगु प्रक्रिया न्ह्याकेधुंकूगु खँ वय्कलं धयादीगु दु।

संस्थाया आःयागु विधानय् देय्या सङ्घीयतालिसे अनुकूलन, समावेशीकरण, रेडक्रस व रेडक्रिसेन्ट सोसाइटीया अन्तर्राष्ट्रिय महासङ्घया मापदण्डलिसे सामञ्जस्यता लगायत आधारय् थौंकन्हय् हे भिंकेत छगू समिति नीस्वंनेगु ज्या जूगु नायः नेपालं धयादीगु दु। वय्कलं संसारया फुक्क धैथें देसय् ब्यागलं कानुनपाखें रेडक्रस व रेडक्रिसेन्ट सोसाइटी सञ्चालन जुयाच्वंगु सन्दर्भय् नेपालय् आःतक नं रेडक्रस ऐन जारी जुइ मफुनिगुलिं सरकारलिसे समन्वय व ग्वहालिया लागि थ्व समिति गठन यानागु धकाः धयादिल।

Categorized in राष्ट्रिय