बागमती प्रदेशया मुख्यमन्त्री बहादुरसिंह लामां स्वास्थ्योपचार सेवायात निःशुल्क यायेगु कथं ज्या जुयाच्वंगु धयादीगु दु।

बागमती प्रदेश स्वास्थ्य मन्त्रालय अन्तर्गत स्वास्थ्य निर्देशनालय नं थौं थन आयोजना याःगु वार्षिक समीक्षा ज्याझ्वलय् वय्कलं स्वास्थ्य मन्त्रालय व मातहतया निकायपाखें नागरिकतय्त वासः यायेगु स्वयाः नं बिरामी जुइके हे मबिइकेत सतर्क यायेगु चेतनामूलक ज्याझ्वः हयेत इनाप यानादिल।

वय्कलं बजारय् अप्रमाणित व स्वास्थ्य सम्बन्धी परीक्षण याना मतःगु नसाः त्वँसा मनयेगु, व्यवस्थित जीवन पद्धति अवलम्बन यायेगु बानी दयेकेमाः धयादिल। नापं वय्कलं स्वस्थ्य जीवन म्वायेत उत्प्रेरित यायेगु ज्याझ्वः न्ह्यज्याकीगु खँ कनादिल। स्वास्थ्यमन्त्री किरण थापामगरं सङ्घीयता लागू जुइ धुंकाः अस्पतालया प्राविधिक व मेमेपिं जनशक्ति अप्वयाः स्वास्थ्य क्षेत्रय् नं व्यापक सुधार जूगु खँ धयादिल।

वन लिसे वातावरणमन्त्री कृष्णप्रसाद सिलवालंं बिरामीया स्वास्थ्य भिंकेगु हे मूखँ तायेकाः स्वास्थ्यकर्मीतय्सं ज्या यायेमाः धकाः धयादिल।

Categorized in राष्ट्रिय