विश्व बैंक व अन्तर्राष्ट्रिय मुद्रा कोषया वार्षिक बैठकय् ब्वति कायेत थन दीम्ह उपप्रधानमन्त्री नापं अर्थमन्त्री विष्णु पौडेलं बुधबाः उगु बैंकया दक्षिण एसिया मामिला स्वइम्ह न्वकू मार्टिन रेजरलिसे नापलानाः खँ ल्हानादीगु दु।

उगु खँल्हाबल्हाय् नेपालय् लजगाः सिर्जना यायेगु विषयय् केन्द्रित जूगु थनया नेपाली राजदूतावासं कनादीगु दु। नेपालय् व्यावसायिक वातावरणया सुधार, मू पूर्वाधार आयोजना तय्गु कार्यान्वयन व विप्रेषण आप्रवाहया माध्यमपाखें नं लजगा सिर्जना यायेगुबारे खँल्हाबल्हा जूगु खः। थ्व हे झ्वःलय्, विश्व बैंकं नेपाःयात प्राकृतिक तःस्यंलिपाया पुनर्निर्माणया लागि ग्वहालि याइगु जूगु दु।

ग्वाहालि सम्बन्धी सम्झौताय् नेपाः सरकार व विश्व बैंक दथुइ हस्ताक्षर जुइ धुंकूगु दु।अर्थ मन्त्रालयया सचिव रामप्रसाद घिमिरे व नेपाःया लागि विश्व बैंकया प्रतिनिधि डेविड सिसलेनंं सम्झौतापत्रय् हस्ताक्षर यानादीगु दु। सम्झौता कथं विश्व बैंकं १५ लाख डलर उपलब्ध याइगु जूगु दु।

उपप्रधानमन्त्री पौडेल व विश्व बैंक (दक्षिण एसिया मामिला)या उपाध्यक्ष मार्टिन रेजरया उपस्थितिइ जूगु हस्ताक्षर ज्याझ्वःलय् नेपाःया प्राकृतिक व जलवायु हिउपाःया हुनिं वइगु स्वास्थ्य जटिलताया निंति स्रोत परिचालन याइगु खँ धाःगु दु।

Categorized in राष्ट्रिय