राष्ट्रपति रामचन्द्र पौडेललिसे सङ्घीय संसदय् प्रतिनिधित्व यानाच्वंपिं मू प्रतिपक्षनापंया दलया नेतातय्सं नापलानादीगु दु। राष्ट्रपति भवन शीतल निवासय् मू प्रतिपक्षी दलया नेतानापं नेकपा (माओवादी केन्द्र) या नायः पुष्प कमल दाहाल ‘प्रचण्ड’जुनापं प्रतिपक्षय् च्वनाच्वंपिं दलया नेतातय्सं नापलानादीगु दु।

प्रतिपक्ष दलतय्सं प्रधानमन्त्री केपी शर्मा ओलीयात ज्ञापनपत्र लःल्हाःगु सन्दर्भय् सरकारपाखें जूगु मगाःमचाःयाबारे राष्ट्रपतियात खँ कनेत शीतल निवासय् नापलाना वइगु धकाः धयादीगु दु। राष्ट्रपति पौडेललिसे प्रतिपक्ष दलया नेतातय्सं थौंकन्हय्या परिस्थितिबारे जानकारी बिइत जिपिं वइगु खः धासें वय्कःपिंसं लोकतन्त्र व संविधानया संरक्षकया भूमिका म्हितेत इनाप याःगु राष्ट्रपतिया प्रेस सल्लाहकार किरण पोखरेलं धाःगु दु।

नेतातय्सं संविधानया मर्म अःखः व बहुलवादय् आधारित मर्म अःखःगु गुलिखे ज्याखँत जुइत्यंगु खँ न्ह्यथसें थुकी संविधानया संरक्षक व देशया अभिभावकया हैसियतकथं भूमिका म्हितादीत इनाप यानादिल। थ्व हे झ्वलय् राष्ट्रपति पौडेलं थः संविधान, राष्ट्र व राष्ट्रिय एकताया प्रवद्र्ध्धनप्रति प्रतिबद्ध दु व संविधानं थःत ब्यूगु कर्तव्य व सीमाकथं न्ह्याः वनेगु खँय् धुक्क जुयादीत इनाप यानादिल। वय्कलं धयादिल, “संविधानया मर्म व लोकतन्त्रया मर्मयात स्वयाः हे संविधानं निर्धारित राष्ट्रपतिया कर्तव्य व सीमायात स्वयाः जिं ज्या यायेगु खँय् छिकपिं सकसितं विश्वस्त यानाच्वना ।”

संसदय् प्रतिपक्षय् नेकपा (माओवादी केन्द्र)नापं राष्ट्रिय स्वतन्त्र पार्टी, राष्ट्रिय प्रजातन्त्र पार्टी, नेकपा एकीकृत समाजवादी व आमजनता पार्टी दु। राष्ट्रपति पौडेललिसे नापलायेत नेकपा (माओवादी केन्द्र) या नायः दाहाल, शक्ति बस्नेत, राष्ट्रिय स्वतन्त्र पार्टीपाखें सांसदपि शिशिर खनाल व सुमना श्रेष्ठ, राष्ट्रिय प्रजातन्त्र पार्टीपाखें नेता बुद्धिमान तामाङ व हेमजङ्ग गुरुङ, नेकपा (एकीकृत समाजवादी) पाखें नायः माधवकुमार नेपाल व मू न्वकू राजेन्द्रप्रसाद पाण्डे व आमजनता पार्टीपाखें नेता तिलक थापामगरं ब्बति कयादीगु खः।

Categorized in राष्ट्रिय