नेपाल पञ्चाङ निर्णायक विकास समितिया नायः डा. श्रीकृष्ण अधिकारीं वइगु बैशाख महिनानिसें सूर्य सिद्धान्तया थासय् केतकीय ग्रहगणीत सिद्धान्त लागू याःसां नं तिथिया सवालय् गोलमाल मजुइगु कथं हे पञ्चाङ निर्माण यायेगु जुइ धकाः धयादीगु दु।

वय्कलं सिद्धान्त हिल धाःसा बरु गतेया सवालय् उखथुखे लाइ, तिथि व तारिकयात लिच्वः लाइमखु धकाः धयादिल। नेवाः सांस्कृतिक अभियान्तापिंलिसे पञ्चाङया ज्याकू नाराहिटीइ सहलह ब्याकेगु झ्वलय् समितिया नायः डा. अधिकारीं अथे धयादीगु खः। नेपाल पञ्चाङ निर्णायक समितिं वइगु बैशाखंनिसें लागू जुइगु कथं पञ्चाङया नितिं सूर्य सिद्धान्तया थासय् केतकीय सिद्धान्त नालेगु अवस्थाय् नेपाल संवतया न्हूदँ ११४५ निसें दच्छियंकंया पात्रा पिकाइगु अवस्थाय् गते, तिथि, संस्कृतिइ तकं लिच्वः लायेफु धकाः न्ह्यथसें इलय् हे पञ्चाङ समितिपाखें ठोस निर्णय यायेमाः धकाः डेलिगेशन वंगु खः।

नेवाः देय् दबूया संरक्षक नरेश ताम्रकार, नेवाः देय् दबू स्वनिगः विशेष प्रदेश समितिया नायः श्रीकृष्ण महर्जन नेवाः, बरिष्ठ न्वकू नविन थेच्वमि, हलिं नेवाः गुथिया केन्द्रीय नायः विनोद महर्जन, येँ जिल्ला समितिया नायः धनबहादुर महर्जन तिमिला, यल जिल्ला समितिया नायः रविन्द्र शाक्य, ख्वप जिल्ला समितिया नायः नरेश नेवाः, थीथी नेवाः खलः पुचलय् दुथ्यांपिं याना थ्यं मथ्यं निगू दर्जन ब्यक्तित्वपिं सहभागी जुयादीगु खः।

ज्योतिषत नं सहभागी जूगु उगु ज्याझ्वलय् समयसापेक्ष हिउपाः कथं थःपिन्सं सूर्य सिद्धान्तयात त्वःताः केतकीय सिद्धान्त नालेगु नितिं सरकारयात प्रस्ताव छ्वया तयागु खः धकाः धयादिसें नेपाल पञ्चाङ निर्णायक विकास समितिया कार्यकारी निर्देशक सूर्य प्रसाद ढुंगेलं कन्हय् वना सरकारं निर्णय याइगु अवस्थाय् केतकीय सिद्धान्त लागू जुइ धकाः धयादिल।

उगु इलय् नेपाल संवतया न्हूदँया झ्वलय् आधिकारीक रुपं नेपाल पञ्चाङ निर्णायक विकास समितिपाखें नं पात्रो पिकायेमाःगु नापं सरकारपाखें नं पिकायेके बिइगु नितिं भूमिका म्हितेमाःगु बारे नं सहलह जूगु खः।

Categorized in राष्ट्रिय