खुसीं चुइका हःगु फोहर अप्वःया बञ्चरेडाँडाय् वाये यंकाच्वंगु फोहरया मात्रा नं अप्वःया च्वंगु दु। येँ महानगरपालिका वातावरण व्यवस्थापन विभागया कथं स्वनिगःया फोहर व्यवस्थापन याना वयाच्वंगु बञ्चरेडाँडाय् खुसिबाः नापं चुइकाहःगु फोहर नं वायेगु ज्या जुयाच्वंगु दुसा थुकिंयाना न्हिंयान्हिथं वान्छ्वयेत यंकेगु फोहर तसकं अप्पोगु दु।

थ्वयां न्ह्यः स्वनिगःया १८ गू स्थानीय तहया फोहर वायेत निसःगु गाडी छ्यलाच्वंगु खःसा असोज १२ या खुसिबाः लिपा न्हिं स्वसः गाडी छ्यला वयाच्वंगु दु। थौंकन्हय् न्हिया न्हिथं द्वःछि व खुसः मेट्रिक टन फोहर वायेगु ज्या जुयाच्वंगु दु। न्हापा सिसडोलय् वानाच्वंगु फोहर उगु थाय् जाःगुलिं वंगु निदँ न्ह्यनिसें फोहर वायेगु थाय् कथं बञ्चरेडाँडायात छ्यला वयाच्वंगु दु।

थुकथं स्वनिगलय् मूंगु दक्वः फोहर व्यवस्थापन यानावना धाःसा थुगु थाय् छ्यले फइगु अवधि म्हो जुइगु धासें महानगरपालिकां फोहर मुनेगु थासे हे व्यवस्थापन यायेमाःगु खँय् बः बिया वयाच्वंगु दु।

येँ महानगरपालिकाया वातावरण विभागया प्रमुख सरिता राई नं धयादिल – “हाकनं छ्यले ज्यूगु फोहर नं बञ्चरेडाँडाय् थ्यनाच्वन। ध्वगिका साः दयेके ज्यूगु फोहर नं थन हे थ्यंकाच्वन। फोहर मुंनेगु थासे हे मिया छ्वय ज्यूगु सामान तकं बञ्चरेडाँडाय् वायेयंका च्वंगु दु। थुकियात पनेफत धासा जक बञ्चरेडाँडाया आयु अप्वःयेके फइ।”

Categorized in राष्ट्रिय