प्रधानमन्त्री केपी शर्मा ओलीं नेपाल भाषायात पाठ्यक्रमय् दुथ्याकेत सरकारं प्रक्रिया न्ह्याकीगु खँ कनादिइगु दु। शङ्खधर साख्वाः प्रतिष्ठानपाखें मध्यपुरथिमिया शङ्खधर साख्वाः चोकय् न्हूदँ ११४५ या लसताय् ग्वसाः ग्वगु ज्याझ्वलय् नेपाल संवत्या प्रवर्तक नापं राष्ट्रिय विभूति शङ्खधर साख्वाःया झ्वाताय् स्वाँमालं क्वखायेके धुंका प्रधानमन्त्री ओलीं भाषा, संस्कृति व सभ्यता बचे यायेत थः व्यक्तिगत व प्रधानमन्त्री निगूलिं हैसियतं तयार दू धका धयादीगु खः।

प्रधानमन्त्री ओलीं नेपाल भाषायात पाठ्यक्रमय् दुथ्याकेत प्रक्रिया न्ह्याकायंकेगु धाःसें प्रतिष्ठानया छुं छु जायज माग राज्यया क्षमता कथं हंनं पूवंका यंकेगु बचं बियादिल। वय्कलं धयादिल, “नेपाल भाषायात पाठ्यक्रमय् ऐच्छिक विषय कथं दुथ्याकेत माग यानादिइगु दु, व पूवंके मफइगु माग थें मताः।

मैथिली, भोजपुरी थें हे थुकियात नं ऐच्छिक विषयया कथं पाठ्यक्रमय् दुथ्याके फइ। निर्णय मयासें जिं थन नवाये मज्यू।” सरकारीस्तरय् नेपाल भाषाया संरक्षणया निंतिं थी थी कुतः जुयाच्वंगु व उगु झ्वलय् राष्ट्रिय समाचार समिति, नेपाल टेलिभिजन व रेडियो नेपालपाखें नेपाल भासं समाचार प्रकाशन नाप प्रसारण न्ह्याके धुंकूगु खँ वय्कलं न्ह्यथना दिल।

ख्वपयात जीवित सङ्ग्रहालयका कथं काइगु धासें वय्कलं थनया ऐतिहासिक कला व संस्कृति संरक्षण यायेत सरकार प्रतिबद्ध दु धयादिल। संस्कृति, पर्यटन व नागरिक उड्डयनमन्त्री बद्रीप्रसाद पाण्डें शङ्खधर साख्वालं उगु इलय् देशभक्ति व राष्ट्रियताया म्हसीका न्ह्यब्वया दिइगु धकाः च्वछायादिल।

मध्यपुरथिमि नगरपालिकाया प्रमुख सुरेन्द्र श्रेष्ठं मध्यपुरथिमि नगरपालिकां जिल्लाया ऐतिहासिक कला, संस्कृति व परम्परायात हलिंन्यकं न्यंकायंकेत वइगु पुसं मध्यपुर महोत्सव ग्वसाः ग्वयागु दु धका धयादीगु खः। प्रतिष्ठाना नायः ज्ञानराम श्रेष्ठं नेपाल संवत् ११०० य् निसे भिन्तुना आन्दोलनपाखें तःधंगु उपलब्धि जुसां अझ नं यक्व याये ल्यंनिगुलिं थुखेपाखें सरकारं ध्यान बिइमाल धयादिल।

उगु ज्याझ्वलय् प्रधानमन्त्री ओलीं मध्पुरथिमिया ६३ दँ पुलांगु संस्था न्ह्यज्याः खलः थिमि व नेपाल संवतया अभियन्तालिसें भाषा आयोगया दुजः सुरेशकिरण मानन्धरयात शङ्खधर सम्मान देछागु खः ।

Categorized in राष्ट्रिय