उपप्रधानमन्त्री लिसें सहरी विकासमन्त्री प्रकाशमान सिंह वल्र्ड अर्बान फोरमया ज्याझ्वलय् ब्वति कायेत इजिप्टया कायरो प्रस्थान यानादिइगु दु।

वय्कः नेपाली प्रतिनिधिमण्डलया नेतृत्व यासें थौं सुथय् ८ ताःईलय् प्रस्थान यानादिइगु खः। उपप्रधानमन्त्री सिंहयात संस्कृति, पर्यटन व नागरिक उड्डयनमन्त्री बद्री पाण्डें त्रिभुवन अन्तर्राष्ट्रिय विमानस्थल थ्यंका बिदाइ यानादिइगु खः। विश्वया सच्छि व न्यय्गु  स्वयां अप्वः देय्तयसं ब्वति काइगु उगु ज्याझ्वलय् ब्वति कयादिइपिं सहभागीमध्ये सिंह उच्चपदस्थम्ह पदाधिकारी जुयादी।

मेमेगु देय्पाखें सहरी विकास नाप स्वापुदुपिं मन्त्रीतसें जक ब्वतिकाइ। सहरी विकासयाबारे विश्व सम्मेलनय् उपप्रधानमन्त्री सिंहपाखें स्वंगू सत्रयात सम्बोधन यानादी। उगु झ्वलय् वय्कलं नेपाःया बस्ती विकासया झ्वलय् भोगेयाःगु समस्या, जलवायु परिवर्तनया हुनिं भोगे यानाच्वंगु समस्या व बस्ती विकासय् नेपालं हासिल याःगु उपलब्धिया बारे विश्वया ध्यान सालादिइगुु सहरी विकास मन्त्रालयं धाःगु दु।

नेपालय् जलवायु परिवर्तनया लिच्वः यक्व हे खनेदुगुलिं भविष्यय् जलवायु ह्युःपाया लिच्वः मलाइकथं गुकथं सहरीकरण व बस्ती विकास यायेफइ धइगु विषययात उपप्रधानमन्त्री सिंहं मू एजेण्डा दयेकादी। उकथं हे सहरीकरणया लागि हाथ्या जुयाच्वंगु त्वनेगु लः, सुचुकुचु व सहरी पूर्वाधारया व्यवस्थापनया विषययात नं नेपालं प्राथमिकताय् तया खँ ल्ह्वनेगु तयारी याःगु दु।

थ्व हे नोभेम्बर ४ निसें ८ तारिखतक्क कायरोय् वल्र्ड अर्बान फोरमया ज्याझ्वः जुइत्यंगु खः। उपप्रधानमन्त्री सिंह लिसें जहान सिर्जना सिंह, सहरी विकास मन्त्रालयया अधिकारीपिं नं कायरो प्रस्थान याःगु दु। वय्कः ज्याझ्वलय् ब्वतिकया शनिवाः सुथय् लिहाँ झायादी।

Categorized in राष्ट्रिय