मनू स्यायेगु उद्योगय् दोषी ठहर जूम्ह गण्डकी प्रदेशया पूर्वमन्त्री दीपक मनाङेयात ज्वंगु दु। प्रहरीं मनाङेयात थौ येँया सानोभ¥याङय् ज्वंगु दु।

मनाङेयात कम्फर्ट हाउजिङय् सुलाच्वंगु अवस्थाय् ज्वंगु दु धका केन्द्रीय अनुसन्धान ब्युरो (सीआईबी) या प्रमुख एआईजी दीपक थापां जानकारी ब्यूगु दु। मनाङेयात ज्वना फैसला कार्यान्वयनया निति अदालतय् उपस्थित यायेगु धका वयकलं धयादीगु दु।

गण्डकी प्रदेश सभा सदस्य दीपक मनाङेयात सर्वोच्च अदालतं कात्तिक २० गते मनू स्यायेगु उद्योगय् दोषी ठहर याःगु खः। न्यायाधीश डा. नहकुल सुवेदी व टेकप्रसाद ढुंगानाया इजलासं थ्व स्वया न्ह्यः तत्कालीन पुनरावेदन अदालत (आःया उच्च अदालत) यलं याःगु फैसलायात सदर याःगु खः।

तत्कालीन पुनरावेदन अदालत यलं मनाङेयात २०६९ सालय् न्यादँ कैद सजाय न्यकूगु खः। सर्वोच्चं न दोषी ठहर याये धुका मनाङे विरुद्ध पक्राउ पुर्जी जारी याःगु खः।दीपक मनाङेया पुचलं २०६१ सालय् मेम्ह डन मिलन चक्रे धाइम्ह मिलन गुरुङयात तरबारं क्यकूगु खः।

Categorized in अपराध