येँ जिल्ला अदालतं पशुपतिनाथ विकास कोषया गौशाला धर्मशालाय् मारवाडी सेवा समितिया गुगुं नं कथंया हक मदुगु व्याख्या याःगु दु। मारवाडी समुदायं धर्मशालाय् थःपिनिगु मोहियानी हक दुगु दाबी याना वयाच्वंगु खः ।

अदालतं करारया शर्त पालना मयाःगु अवस्थाय् पशुपति विकास कोषं सम्झौता अन्त्य यायेफइगु फैसला नं याःगु दु। फैसलाया खण्ड २३, २४ व २५ य् मारवाडी सेवा समिति व पशुपति विकास कोष दथुइ ब्वलंगु विवादया विस्तृत व्याख्या याःगु दु।जिल्ला अदालतं मारवाडी सेवा समितिपाखे प्रमोद अग्रवालं दायर याःगु फिरादय् दाबी मगाःगु धासें खारेज जुइगु फैसला नं याःगु दु ।

फैसलाया पूर्ण पाठय् मारवाडी सेवा समितिं पशुपति क्षेत्र विकास कोष लिसे याःगु सम्झौताय् मोहियानी हक मदुगु खँ स्वीकार यायेधुंकूगु व थ्व स्वयां न्ह्यः सर्वोच्च अदालतं याःगु फैसलाय् नं थ्व विषय क्वःजीधुंकूगुलिं आः हाकनं उगु विवाद न्ह्यथने आवश्यक मदुगु खँ न्ह्यथनातःगु दु ।

धर्मशालाया ९ रोपनी स्वयां अप्वः जग्गा उपभोग याःगु बापत मारवाडी सेवा समितिं पशुपति विकास कोषयात दछिया ५१ हजार तका जक बाः पुला वयाच्वंगु खः। अदालतं उगु बाः नं युक्तिसंगत मजूगु फैसला याःगु दु ।

येँ जिल्ला अदालतया फैसलाविरुद्ध मारवाडी सेवा समितिं उच्च अदालत यलय् पुनरावेदन याइगु जूगु दु। जिल्ला अदालतया पूर्ण पाठ वयेवं समितिं पुनरावेदन यायेत्यंगु खः।

Categorized in राष्ट्रिय