थ्व हे वइगु मसिर १६ गते जुइगु स्थानीय तह उपनिर्वाचनया निति कन्ह्यः आइतवाः मनोनयन पत्र दर्ता याइगु जुगु दु।

कन्ह्यः सुथय् १० निसे ५ बजे तक सम्बन्धित स्थानीय तहय् स्थापना जूगु निर्वाचन अधिकृतया कार्यालयय् उम्मेदवारया मनोयन दर्ता जुइगु निर्वाचन आयोगया सहसचिव नाप प्रवक्ता नीता पोखरेल अर्यालं धाःगु दु।उगु दिं बहनि ५ बजेनिसे ६ बजे तक उम्मेदवारया धलः न प्रकाशन याइगु जुगु दु। उम्मेदवारया मनोनय दर्ता यायेगु दक्को ज्या पूवंगु दु धका आयोगं धाःगु दु।

उपनिर्वाचनया निति शुक्रवाः ३८ गु निर्वाचन अधिकृतया कार्यलय स्थापन जुइ धुकुगु दु। उपनिर्वाचन जुइगु स्थानीय तहय् ३२ गु मुख्य निर्वाचन अधिकृतया कार्यालय व खुगु निर्वाचन अधिकृतया कार्यालय स्थापना जुइ धुकुगु दु धका निर्वाचन आयोगं धाःगु दु।

अथेहे मसिर ३ गते सुथय् १० निसे न्हिनय् ३ बजे तक उम्मेदवारया विरोधय् उजुरी बिइगु, व हे दिं न्हिनय् ३ बजे लिपा मनोनयपत्र व उजुरीयात कया जाँचबुझ नाप निर्णय याना मसिर ४ गते सनिलया ५ निसे ६ बजे तक उम्मेदवारया नां प्रकाशन याइगु जुगु दु्।

मसिर ५ गते सुथय् ९ निसे न्हिनय् १ बजेतक उम्मेदवारं नां लितः काये फइगु दु। व हे दिं न्हिनय् १ निसे ३ बजेतक लिपागु नां प्रकाशन याना न्हिनय् ३ निसे ५ बजे तक उम्मेदवारयात निर्वाचन चिं लःल्हाइगु जुगु दु। मसिर १६ गते सुथय् ७ निसे न्हिनय् ५ बजे तक मतदान जुइगु दु।

Categorized in राष्ट्रिय