हुम्लाया यइता लागाय् च्वंगु अदानचुली गाउँपालिकापाखें २० न्हु न्ह्यः मचा बुइकूम्ह मिसायात उद्धार याःगु दु। शुक्रबाः नेपाली सेनाया हेलिकोप्टरं वय्कःयात उद्धार याःगु खः।

अदानचुली–५ करगै गांया २० दँ दुम्ह झुपा छत्यालयात बिहीबाः छत्थुँ बेहोस जूगुलिं वासः यायेत श्रीनगर स्वास्थ्य चौकी थ्यंकूगु व अन वासः यायेत सम्भव मजूबलय् हेलिकोप्टरपाखें उद्धार याःगु स्वास्थ्य सेवा ज्याकुथिया प्रमुख डा प्रतीक्षा भारतीं कनादिल।

गामय् च्वंगु स्वास्थ्य चौकीइ मचा बुइकूम्ह छत्यालयात छत्थुँ रक्तस्राव जूबलय् पालिका केन्द्र श्रीनगर स्वास्थ्य चौकीइ यंकूगु व अनं वासः यायेत सम्भव मजूबलय् सम्बन्धित निकायय् खबर बियाः थप वासः यायेत कर्णाली प्रदेश राजधानी वीरेन्द्रनगरया सुर्खेत अस्पतालय् यंकूगु खः।

राष्ट्रपति मिसा उत्थान ज्याझ्वलं हुम्लालिसें कर्णाली प्रदेशया दुर्गम जिल्लाया प्वाथय् दुपिं, मचा बू व्यथां समस्याग्रस्त मिसातय्गु उद्धार यानावयाच्वंगु दु। (रासस) 

Categorized in राष्ट्रिय