दयाः समस्या जिल्लाया कारागार ज्याकूथि भरतपुरय् नखःचखःया इलय् जक ५९ म्ह कैदीबन्दी थपे जुवल ।

वंगु असोज १५ गते न्हय्सः व ५६ म्ह कैदीबन्दी दूगु थुगु कारागारय् कात्तिक मसान्ततक ८१५ म्ह कैदीबन्दी थ्यंगु कारागार ज्याकूथि भरतपुरं धाःगु दु। ज्याकू प्रमुख कमलप्रसाद आचार्यया कथं थपेजुपिं कैदीबन्दीलय् लागु वासः व खुँज्याया मुद्दालापिं अप्वः दु।

कारागारय् कैदीबन्दी अप्वःया वःगुलि  व्यवस्थापनय् थाकुयावःगु धकाः वय्कलं धयादिल। वय्कया कथं कारागारय् क्षमता स्वयां झण्डै तेब्बर कैदीबन्दी च्वनाच्वंगु धाःगु दु। आः २५म्हेसिया क्षमता दूगु मिसा बन्दीगृहय् ४९ म्ह व निसः व ५५ म्हेसिया क्षमता दूगु मिजं बन्दीगृहय् न्हय्सः व ६६ म्ह च्वनाच्वंगु दु।

उपिनापं स्वम्ह आश्रित मचात नं च्वनाच्वंगु दु। थन लिकसं च्वंगु जिल्ला नवलपरासी (बर्दघाट सुस्तापूर्व) पाखें कैदीबन्दी ल्ह्ययेगु ज्या जुगुलिं नं चाप अप्वःयावःगु वय्कलं कनादिल। आः तक व्यवस्थापन जुयावःसां कैदीबन्दी अप्वःया वइगु झ््वलय् व्यवस्थापनय् याये थाकुइगु वय्कलं धयादिल।

वय्कलं धयादिल, “नखःचखः सिधय् सातिकं हे कैदीबन्दी वयेगु क्रम तच्वय् धुंकूगु दु।” आः कारागारया लकफसय् वःगु ह्यूपाःनं ज्वरो वया सेँखंचाना मुसु वःपिं ल्वगित अप्वःया वयाच्वन। आचार्यया कथं आः २०–२५ म्ह सेँखंचाना मुसुवःपिं ल्वगित दु। उमिगु स्वास्थ्य शाखां निगरानीइ तयाः वासःयायेगु ज्या यानाच्वंगु दु।

ग्वाः ग्वाः मुनिगु थाय् जुगुलिं ल्वय् छम्ह मनुखं मेम्ह मनूयात पुनीगु संभावना आपाः दइ धकाः वय्कलं धयादिल। ज्याकुथिं कैदीबन्दीया निंतिं माःगु लुमुइसेच्वंगु कापः इनेगु तयारी यानाच्वंगु नं वय्कलं कनादिल।

Categorized in अपराध