श्री चन्द्रविनायक व श्री भैरवनाथ रथयात पशुपतिनाथ मू देगः लागाय् चाःहिइकूगु दु। चन्द्रविनायकयात पशुपतिनाथया काय् खः धैगु धार्मिक मान्यता नं दु।

थ्व हे मान्यताया आधारय् चन्द्रविनायक जात्रायात पशुपतिनाथ देगः चाहिइकेगु चलन जूगु येँ महानगरपालिका–७ या नायः विमलकुमार होडां धयादीगु दु। चन्द्रविनायकयात अबु अथे धैगु भगवान् पशुपतिनाथया दर्शन याकेधुंकाः पशुपतिपाखें चुच्चेपाटीतकया मू चुकय् चाःहिइकूगु जात्रा समन्वय समितिया दुजः राजु भारतीं न्ह्यथनादिल। थ्व जात्रा पशुपतिनाथपाखें चुच्चेपाटीतक तसकं महत्व बियाः न्यायेकी।

पशुपतिनाथ अमालकोट कचहरीकाद्वारे रामकृष्ण डङ्गोलं कात्तिक शुक्ल पुन्हिकुन्हु शुक्रबाः सुथय् चन्द्रविनायक देगलय् विशेष पुजा यानाः जात्रा न्ह्याकूगु खः। उकुन्हु बहनी देगःया लागाय् मिँ पनेगु ज्या जुल। मिँ च्याकेत पशुपतिनाथ अमालकोट कचहरीं सिँ बिइगु परम्परा दु। मार्गशीर्ष कृष्ण प्रतिपदा कुन्हु निगुलिं रथयात देगः जःखः चाः हिइकाः गङ्गाहिटीइ यंकाः म्वः ल्हुइकूगु खः।

म्वःल्हुइके धुंकाः निगुलिं खःत उकुन्हु बहनी हे चारुमती विहारय् यंकूगु खः। जात्रा थौँ स्वयां थ्यं मथ्यं ३५० दँ पुलां धैगु विश्वास यानातःगु दु। नेपाल संवत् ८०१ य् जुजु भूपालेन्द्र मल्लं थ्व जात्रा न्ह्याकूगु स्थानीयतय् धापू दु। श्री चन्द्रविनायक व भैरवनाथया रथयात्रा कात्तिक शुक्ल पुन्हि अथे धैगु शुक्रबाःनिसें न्ह्याःगु खः।

जात्राया न्हापांगु न्हिकुन्हु ‘मरःजा नकेगु’ कुमार कुमारीया पुजा यानाः विनायकया प्रसाद नकूगु खः। चन्द्रविनायक स्वनिगःया प्यम्ह विनायकमध्ये छम्ह खः। कार्तिक शुक्ल पुन्हि कुन्हु न्ह्याःगु जात्रा मार्गशीर्ष कृष्ण तृतीया कुन्हु अमालकोट कचहरीया द्वारें श्री चन्द्रविनायक व भैरवनाथयात सिन्हः लःल्हायेधुंकाः मार्ग शीर्ष कृष्ण तृतीया कुन्हु क्वचाइगु परम्परा दु।

जात्रा बांलाक क्वचाःगुलिं लसताय् चाबहिल लागाय् सिन्हःजात्रा यायेगु परम्परा दयाच्वंगु न्ह्यथनादिल। जात्रा कात्तिक शुक्ल पुन्हि कुन्हु चाबहिल लागाय् न्ह्याःगु खः। दँय्दसं कात्तिक शुक्ल पुन्हिनिसें मार्ग शीर्ष कृष्ण तृतीया तक प्यन्हु पशुपति, जयबागेश्वरी, मित्रपार्क, चाबहिल व चुच्चेपाटी लागाय् चन्द्रविनायक जात्रा तसकं लसतां न्यायेकीगु परम्परा भूपालेन्द्र मल्लया इलंनिसें जुयावयाच्वंगु खँ न्ह्यथनादिल।(रासस)

Categorized in राष्ट्रिय