निर्वाचित राष्ट्रपति डोनाल्ड ट्रम्पं सीमा सुरक्षा सम्बन्धी राष्ट्रिय संकटकाल घोषणा यायेगु व अमेरिकी सेनायात छ्यलाः दस्तावेजविहीन आप्रवासीतय्त सामूहिक रुपं देश निकाला यायेगु घोषणा याःगु दु।

राष्ट्रपति जो बिडेनया प्रशासनय् अवैध आप्रवासीया ल्याः अप्वयेधुंकाः ट्रम्पं लखौं दस्तावेज मदुपिं आप्रवासीतय्त देश निकाला यायेगु व मेक्सिकोलिसेया सीमायात नियमन यायेगु धाःगु खः। ट्रम्पं थःगु सामाजिक संजाल प्लेटफर्म ट्रुथ सोशलय् छम्ह रुढिवादी कार्यकर्तां नकतिनि च्वःगु छगू पोष्टयात रिपोष्ट याःगु दु।

वय्कलं उकी च्वयादीगु दु, “न्हूम्ह निर्वाचित राष्ट्रपति राष्ट्रिय आपतकाल घोषणा यायेत तयार दु व सामूहिक निर्वासन ज्याझ्वःयात न्ह्यःने यंकेगु निंतिं तयार दु।” नोभेम्बर ५ तारिखय् डेमोक्र्याटिक उपराष्ट्रपति कमला ह्यारिसयात बुकाः ट्रम्प हाकनं अमेरिकी राष्ट्रपति पदय् निर्वाचित जूगु खः।

वय्कलं आप्रवासन व भन्सार प्रवर्तनया पूर्व कार्यवाहक प्रमुख टम होमनयात थःगु “सीमा जार” धकाः नां बियादीगु खःसा आप्रवासन सम्बन्धी कट्टरपंथी दुजःतय्गु मन्त्रिपरिषद घोषणा यानादीगु खः। वंगु जुलाईइ जूगु रिपब्लिकन नेशनल कन्भेन्सनय् ब्वति कयाः वय्कलं समर्थकतय्त धयादी, “जिं लखौं अवैध आप्रवासीतय्त सन्देश बी चाहेजू कि बिडेनं हःपिंत लित छ्वयेगु जुइ।” अधिकारीतय् कथं अमेरिकाय् थ्यंमथ्यं १ करोड १० लाख मनूत गैरकानूनी रुपं च्वनाच्वंगु दु।

ट्रम्पया देश निकाला योजनां थ्यंमथ्यं निगू करोड परिवारयात प्रत्यक्ष रुपं लिच्वः लाकीगु अनुमान याःगु दु। ट्रम्पं थःगु आप्रवासन सम्बन्धी कारवाहीया विस्तृत जानकारी ब्यूगु मदुनि । तर चुनावी अभियानया झ्वलय् वय्कलं देश निकालायात याकनं यायेत ‘एलियन एनिमिज एक्ट १७९८’ लागू यायेगु धकाः बारम्बार धयादीगु खः।

Categorized in अन्तर्राष्ट्रिय