प्रधानमन्त्री केपी शर्मा ओली न्ह्यःने प्यालेस्टाइनयात इजरायलं यानाच्वंगु हमलाविरुद्ध दनेमाःगु माग यासें थी थी राजनीतिक दल व नागरिक संस्थातय्सं थौं ध्यानाकर्षण पौ लःल्हाःगु दु।

नेपाल कम्युनिष्ट पार्टी (माओवादी केन्द्र) या वरिष्ठ उपाध्यक्ष नापं पूर्व उपप्रधानमन्त्री नारायणकाजी श्रेष्ठलिसें थीथी दल व नागरिक संस्थाया प्रतिनिधितय्सं थौं प्रधानमन्त्री निवास, बालुवाटारय् प्रधानमन्त्री ओलीयात नाप लानाः इजरायलं प्यालेस्टाइन व लेबनानयात मद्दिक बल छ्यलाः हमला यानाः च्वंगुलिं उकिया विपक्षय् नेपाल सरकार अन्तर्राष्ट्रिय मञ्चय् वनेमाःगु धकाः इनाप यानादिल।

ध्यानाकर्षण पतिइ नेपाःया तटस्थ परराष्ट्र नीतिया मान्यताय् ह्यूपाः हयेत व अन्याय जूपिनि पक्षय् संयुक्त राष्ट्रसङ्घ थेंजाःगु मञ्चय् मत बिइत माग यानातःगु दु। ज्ञापन पतिइ हमासं ज्वनातःपिं नेपाःया विपीन जोशी व इजरायलय् दुपिं द्वलंद्वः नेपाःया ल्याय्म्हतय्गु जीवन रक्षा यायेत युद्धकाल दुने नेपाः हयेत कुतः यायेमाःगु नं माग न्ह्यथनातःगु दु।

प्रधानमन्त्री ओलीं नेपाः विश्वशान्ति, मानव अधिकार व न्यायया पक्षय् च्वनेगु धयादिल। वय्कलं तटस्थता धइगु बल्लाम्हेसिनं दायाच्वनेगु व बःमलाम्हेसिनं सह यानाः च्वनेगु धइगु मखु धासें ध्यानाकर्षण पतिइ न्ह्यथंगु विषयया अःखः सरकार मवनेगु धयादिल। “झीपिं विश्वशान्तिया पक्षय् दु। छुं नं शक्ति विरुद्ध थः हे ल्वाः वनेगु मखु।

छुं नं सैन्य गठबन्धनय् च्वनेगु मखु तर अन्याय सह यानाः च्वनेगु मखु”, प्रधानमन्त्री ओलीं धयादिल, “झीसं हलिमय् निरीह शान्ति मखु, न्यायपूर्ण शान्ति व मानव अधिकारया रक्षा यायेगु खः।”

थ्व हे ज्याझ्वलय् माओवादी केन्द्रया महासचिव देवप्रसाद गुरुङ, राष्ट्रिय जनमोर्चाया नेत्री दुुर्गा पौडेल, नेकपा (एकीकृत समाजवादी) या सचिव शेरबहादुर कुँवर, क्रान्तिकारी कम्युनिष्ट पार्टीया वरिष्ठ नेता सिपी गजुरेल, जनता समाजवादी पार्टी नेपालया विदेश विभाग प्रमुख अर्जुन थापा, प्रगतिशील रुपान्तरण आन्दोलनया न्ह्यलुवा श्याम श्रेष्ठपि ब्वति काःगु खः।(रासस)

Categorized in राष्ट्रिय