प्रहरीं ह्वाट्सएपपाखें थः आपराधिक पुचःया अन्डरकभर एजेन्ट धासें फोन यानाः ध्यबा फ्वंगु द्वपनय् छम्ह डाक्टरयात ज्वनाः सार्वजनिक याःगु दु।

भोजपुर नगरपालिका–११ छेँ जुयाः थौंकन्हय् यलया महालक्ष्मी नगरपालिका सानो गाउँ च्वनीम्ह ३२ दँया डा आशिष दाहालयात ज्वंगु स्वनिगः अपराध अनुसन्धान ज्याकुथि टेकुया सूचं अधिकारी नापं प्रहरी उपरीक्षक काजीकुमार आचार्यं न्ह्यथनादिल।

वय्कलं धयादिल, “ज्वंम्ह दाहालं स्वनिगः दुने थीथी मनूतय्त ह्वाट्सएपपाखें थः अन्डरवल्र्ड नेटवर्कया अन्डरकभर एजेन्ट खः धकाः विहारलिसें मेमेगु थासं ‘कन्ट्याक्ट किलर’ ल्हातिइ कयाः स्याये धकाः मेसेज यानाः ५० द्वःनिसें निगू लखतक ध्यबा फ्वनेगु यानावयाच्वंगु सूचंया आधारय् येँया शङ्खमुलं ज्वंगु खः।”

ज्वंम्ह दाहालयात माःगु कथं अनुसन्धान नापं कारवाही यायेत जिल्ला प्रहरी परिसर भद्रकाली छ्वःगु सूचं अधिकारी आचार्यं कनादिल। (रासस)

Categorized in अपराध