प्रधान सेनापति अशोकराज सिग्देल व नेपाः भ्रमणय् वयादीम्ह भारतीय स्थल सेनाध्यक्ष उपेन्द्र द्विवेदी दथुइ निगू देय्या सैनिकदथुइ पारस्परिक साझेदारी व हितय् केन्द्रित जुयाः सैनिक मुख्यालय जङ्गी अड्डाय् निगुपक्षीय खँल्हाबल्हा जूगु दु।

खँल्हाबल्हाया झ्वलय् नेपाली सेनाया ज्याया जिम्मेवारी व सम्पादन यानावयाच्वंगु ज्याया बारे चीहाकःगु जानकारी न्ह्यब्वःगु सैनिक प्रवक्ता सहायक रथी गौरवकुमार केसीं कनादीगु दु। थ्व हे झ्वलय् भारतीय स्थल सेनाध्यक्षं सैनिक मञ्च टुँडिखेलय् च्वंगु वीर स्मारकय् स्वाँमाः क्वखायेकादिल।

राष्ट्रपति रामचन्द्र पौडेलं थौं स्थल सेनाध्यक्ष द्विवेदीयात नेपाःया सेनाया मानार्थ महारथीया दर्जा बियाः हनेगु ज्याझ्वः दु। वंगु १६ असारय् सेनाध्यक्ष नियुक्त जुयादीम्ह द्विवेदीया थ्व न्हापांगु औपचारिक नेपाः भ्रमण खः। कन्हय् प्रधानमन्त्री केपी ओली व रक्षामन्त्री मानवीर राईलिसे वय्कलं बिस्कंबिस्कं नाप लाइगु ज्याझ्वः दु।

सन् १९५० निसें नेपाः व भारतदथुइ निगुलिं देय्या सेना प्रमुखयात मानार्थ महारथीया दज्र्यानी चिं लःल्हाइगु परम्परा दु । थ्व स्वयां न्ह्यः भारतया राष्ट्रपति रामनाथ कोविन्दं नेपाःया उबलय्या प्रधानसेनापति प्रभुराम शर्मायात २०७८ कात्तिक २४ गते भारतीय स्थलसेनाया मानार्थ महारथीया दज्र्यानी चिं लःल्हाःनादीगु खः।

अथे हे भारतीय स्थल सेनाध्यक्ष मनोज पाण्डेयात उबलय्या राष्ट्रपति विद्यादेवी भण्डारीं २०७९ भदौ २० गते नेपाःया सेनाया मानार्थ महारथी पद लःल्हाःनादीगु खः। सन् १९५० य् भारतया सेनाध्यक्ष जनरल केएम परिअप्पायात न्हापांखुसी नेपाःया सेनाया मानार्थ महारथी लःल्हाःगु खः धाःसा २०२६ सालय् उबलय्या प्रधानसेनापति सुरेन्द्रबहादुर शाहयात नं न्हापांखुसी भारतीय सेनाया मानार्थ महारथी पद लःल्हाःनादीगु खः।

जःलाखःला देय्या सेना दथुइया थजाःगु हनेगु परम्परां सम्बन्धयात क्वातुकाः तयेत व सौहार्दता दयेकेत छगू महत्वपूर्ण कडीकथं भूमिका म्हितीगु भलसा याःगु दु। प्रधान सेनापति सिग्देलया औपचारिक ब्वनाय् भारतीय स्थल सेनाध्यक्ष द्विवेदी न्यान्हुया नेपाः भ्रमणया झ्वलय् बुधबाः न्हिनय् येँ थ्यंकझाःगु खः। (रासस)

Categorized in राष्ट्रिय