नेपाल कम्युनिष्ट पार्टी (एमाले) व चिनियाँ कम्युनिष्ट पार्टीया नेतातय् दथुइ सहलह ब्याःगु दु।

चीनया राजधानी बेईजिङय् बुधबाः बहनी नाप लानाः नेतातय्सं प्रधानमन्त्री केपी शर्मा ओलीं यायेत्यंगु चीन भ्रमणं जःलाखःला देय्त दथुइ दयाच्वंगु स्वापु व मंकाः ज्यायात अझ च्वन्ह्याकीगु भलसा कयाःगु भ्रमण दलया जः एमाले प्रचार विभागया दुजः दीपक ज्ञवालीं न्ह्यथनादिगु दु।

उगु झ्वलय् एमालेया बरिष्ठ उपाध्यक्ष ईश्वर पोखरेलं पार्टी अध्यक्ष नापं प्रधानमन्त्री ओलीया भ्रमणं निगुलिं देय् दथुइया स्वापुयात अझ बल्लाकीगु व लिक्क हइगु भलसा प्वंकादिलगु दु। वय्कलं नेपाः व चीन दथुइ जूगु पुलांगु सम्झौतात छ्यलाबुलाया झ्वलय् ठोस योजना दयेकाः न्ह्यावनेगु व निगुलिं देय्या दथुइया ऐतिहासिक स्वापुयात अझ च्वकाय् थ्यंकेत प्रधानमन्त्री ओलीपाखें जुइगु चीन भ्रमण कोसेढुङ्गा सावित जुइ धइगु बिचाः तयादिगु दु।

चिनियाँ कम्युनिष्ट पार्टीया विदेश विभाग प्रमुख लिउ जियन चाओं प्रधानमन्त्री ओली यानादीत्यंगु चीन भ्रमणं चिनियाँ व नेपाःमितय्सं तःधंगु आश यानाच्वंगु धासें प्रधानमन्त्री ओलीयात लसकुस यायेत चिनियाँ पक्ष आतुर जूगु धयादिगु दु। वय्कलं नेपाः व चीन दथुइ सलंसः दँनिसें दयाच्वंगु ऐतिहासिक स्वापुयात विकास व समृद्धिया दिशाय् आपालं आपाः छ्यलेमाःगु खँय् निगुलिं देय् तय्सं ध्यान बिइ माःगुली बः बियादिगु दु।

चिनियाँ कम्युनिष्ट पार्टीया विदेश विभागया उपमन्त्री सन हाईयानं भिंगु जःला खःला देय् नेपाःया विकास व समृद्धिया पक्षय् माःकथं ग्वाहालि यायेत चिनियाँ पक्ष तयार दूगु खँ न्ह्यथनादिल। चिनियाँ कम्युनिष्ट पार्टी अन्तर्गत विदेश विभागया ब्वनाय् एमालेया वरिष्ठ उपाध्यक्ष पोखरेलया नेतृत्वय् १५ दुजःया प्रतिनिधिमण्डल आः चीन भ्रमणय् दु।(रासस)

Categorized in राष्ट्रिय