नेकपा (माओवादी केन्द्र) या अध्यक्ष नापं पूर्वप्रधानमन्त्री पुष्पकमल दाहाल ‘प्रचण्डं’ कुचाः कुचाः जूगु माओवादी पार्टी छप्प जुइगु प्रक्रियाय् दूगु धका धयादिगु दु।

चितवनया इच्छाकामना गाउँपालिका–४ कुरिनटारय् थौं पार्टी कार्यकर्तातलिसे नाप लायेगु नापं सहलह ज्याझ्वलय् नायः दाहालं कुचाः कुचाः जुयाच्वंगु आः छथाय् च्वनिइगु प्रक्रिया सुरु जूगु दु धका धयादिगु खः। अध्यक्ष दाहालं थथे धयादिल, “आः मिले जुइगु बाहेक मेगु विकल्प मदु, ब्वःथलाया झ्वः दिउगु दु, दक्वः माओवादी छप्प जुइगु प्रक्रियाय् दु।” देय्या विकास व निकासया निंतिं पूर्ण समानुपातिक व प्रत्यक्ष कार्यकारी राष्ट्रपति प्रणाली माः धैगु वय्कःया धापू खः।

अध्यक्ष दाहालं धयादिल, “झीसं पूर्ण समानुपातिक व प्रत्यक्ष कार्यकारी राष्ट्रपति प्रणाली धया वया च्वनागु दु, आः बुलुहुँ दक्वः पार्टीया बुद्धिजीवी तय्सं नं थ्व खँ खः धकाः धाये धुंकूगु दु।” आःया निर्वाचन प्रणालीं राजनीतिक भ्रष्टाचार अप्वयेकीगु वय्कःया धापू दु। कार्यकर्तातय्त पार्टीं याःगु फुक्क बांलाःगु ज्याया बारे जनतायात थुइकेत अध्यक्ष दाहालं उजं नं बियादिल।

Categorized in राजनीति