उपप्रधानमन्त्री नापं सहरी विकासमन्त्री प्रकाशमान सिंहं नेपाःया जःलाखःला देय् नापनापं अन्तराष्ट्रिय समुदायनाप मैत्रीपूर्ण स्वापू तब्याकाः न्ह्यावनाच्वंगु खँ धयादीगु दु।

येँय् च्वंगु चिनियाँ दुतावासं छत्रपाटी निःशुल्क चिकित्सालय (हस्पिटल) यात ग्वाहालि कथं ब्यूगु विद्युतीय सवारी लःल्हायेत थौं जूगु छगू ज्याझ्वलय् वय्कलं दूतावासया ग्वाहालिं निगू देय् दथुइ सम्बन्ध क्वातूगुया दसि खः धकाः धयादिल। उपप्रधानमन्त्री सिंहं हलिमयय् जलवायु ह्यूपाया बांमलाःगु लिच्वः अप्वयाच्वंगु इलय् चिकित्सालययात विद्युतीय सवारी लःल्हागुलिं सुभाय् देछानादिल।

समुदाययात चिकित्सा सेवा बिइत क्लिनिकया कथं पलिस्था जूगु थुगु चिकित्सालयं सुविधां जाःगु अस्पतालं थें हे सेवा बियावयाच्वंगु वय्कलं धयादिल। नेपाःया निंतिं चिनियाँ राजदूत छन सङनं नेपाःया आर्थिक विकास व समृद्धिया निंतिं चीनं ग्वाहालि यानाः वयाच्वनागु खँ न्ह्यथंनादिसें निगू देय् दथुइ थी थी लागाय् मंकाज्या माःगु कथंया लिच्वः काये फयाच्वंगु कनादिल।

वय्कलं छत्रपाटी निःशुल्क चिकित्सालय (हस्पिटल) पाखें दंक गुणस्तरीय स्वास्थ्य सेवा बियावयाच्वंगु खँ न्यनाः थःत लसता जूगु खँ कनादिल। थुगु ज्याझ्वलय् येँया चिनियाँ दूतावासं चिकित्सालययात विद्युतीय सवारी लःल्हाःगु खः।

Categorized in राष्ट्रिय