राष्ट्रिय चिकित्सा शिक्षा आयोगपाखें स्वीकृति दूगु झापाया बीएण्डसी मेडिकल कलेजं चिकित्सा शास्त्र अन्तर्गत एमबिबीएस (स्नातक तह)य् ब्वंकेत तयारी पूवंकेधुंकूगु दु।

सर्वाेच्च अदालतं २०८० चैत १३ गते बीएण्डसी मेडिकल कलेजयात सम्बन्धन बिइत परमादेश जारी याःगु खः। व हे परमादेशया लिधंसाय् काठमाडौँ विश्वविद्यालयं सम्बन्धन ब्यूगु खः। चिकित्सा शिक्षा आयोगं न्ह्यानाच्वंगु शैक्षिकसत्रया निंतिं बीएण्डसीयात ५० ब्वनामि ब्वंकेत सिट क्वःछ्यूगु दु।

थौंकन्हय् नियमकथं हे ब्वनामि भर्ना जुयाच्वंगु कलेजया जनसम्पर्क अधिकृत प्रमेश गिरीं धयादिल। न्हापांगु दँय् ५० विद्यार्थीतय्त ब्वंकेत कलेजं माःगु जनशक्ति, भौतिक पूर्वाधार व शैक्षिक ज्वलंया व्यवस्था यायेधुंकूगु वय्कलं धयादिल। कलेजं मेचीनगर नगरपालिका–१२ धाइजनय् विद्यार्थीतय्त ब्वंकेत न्यागू तलाया ‘बेसिक साइन्स ब्लक’ दयेकूगु दु धाःसा ‘क्लिनिकल साइन्स’ ब्वंकेत बिर्तामोड नगरपालिका–५ य् च्वंगु बीएण्डसी हस्पिटलय् व्यवस्था याःगु जनसम्पर्क अधिकृत गिरीं धयादिल।

“एमबिबीएस ब्वंकेत ताःईनिसें जिपिं तयारीइ लगे जुयाच्वनागु खः”, वय्कलं धयादिल, “धाइजनय् सुविधां जाःगु साइन्स ब्लक दु। अभ्यास यायेत विद्यार्थीतय्सं बीएण्डसी अस्पताल हे छ्यलेफइ।”कलेजय् सच्छि व ५० म्ह विद्यार्थीतय्त अःपुक ब्वंकेगु व्यवस्था जूगु दु। (रासस)

Categorized in राष्ट्रिय