जिल्लाया यलय् च्वंगु हलिं सम्पदा लागाय् च्वंगु ऐतिहासिक अदालतया भवन पुनः निर्माणया ज्या न्ह्याःगु दु।

सम्पदा लागा दुने लाःगु जीर्ण जुयाच्वंगु उगु अदालत मोहनि सिधयेवं हे पुनःनिर्माणया ज्या न्ह्याःगु खः। पुनःनिर्माण न्ह्याःगु ऐतिहासिक अदालतया भवन विसं १९९० या भुखाय् स्वयां न्ह्यः स्वंगू तला दूगु खः। पुलांगु हे स्वरूपय् भवन दयेकेत नक्शा पास जुइ धुंकूगु स्मारक संरक्षण नापं दरबार स्वइगु ज्याकुथिं धाःगु दु।

भारतीय दूतावासया ग्वाहालिं ज्या न्ह्याःगु ऐतिहासिक अदालत भवनया पुनःनिर्माण पतली भैरव निर्माण व्यवसायी कम्पनीं १८ लाय् क्वचायेकेगु कथं भालाः काःगु कम्पनीया इञ्जिनियर किसन कुटाभारं धयादिल। १८ क्वतिं पुलांगु हे संरचनाय् दयेकेत्यंगु अदालतय् यल लाय्कू सङ्ग्रहालयया ज्याकुथि जुइफइगु लाय्कू सङ्ग्रहालयया प्रमुख सुरेशमान लाखें न धयादीगु दु। वय्कलं थथे धयादिल, “ताःई पियाच्वने धुंकाः जीर्ण जुयाच्वंगु अदालत भवन दयेकेगु ज्या न्ह्याःगु दु।

पुलांगु हे पहलं निर्माण जुइधुंकाः यल लाय्कू लागाया स्वरूप अझ बांलाइगु जूगु दु।” जीर्ण भवन दुने च्वंगु सामान सुरक्षितकथं मेगु थासय् ल्ह्ययेधुंकूगु यलया स्मारक संरक्षण नापं दरबार स्वइगु ज्याकुथिया सूचं अधिकारी पाठकं धयादीगु दु।

वय्कःया कथं ऐतिहासिक अदालत भवनलिसें पाटनदरबार लागाया मेमेगु ऐतिहासिक सम्पदा गुलिं पुनःनिर्माण जुइत्यंगु दु धाःसा गुलिं पुनःनिर्माणया झ्वलय् दु। (रासस)

Categorized in राष्ट्रिय