ओली प्रधानमन्त्री केपी शर्मा ओलीं नेपाः प्रिमियर लिग (एनपिएलं) नेपाःया पर्यटन व युवा प्रतिभायात अन्तर्राष्ट्रिय दबूलिइ न्ह्यब्वयेतः तःधंगु ग्वाहालि जुइ धयादिइगु दु।

थौं ऐतिहासिक धरहरा लागाय् एनपिएलया ट्रफी उलेज्या यासें वय्कलं लिगया निंतिं सरकारं फक्व ग्वहालि व हःपाः बिइगु भलसा बियादिल। प्रधानमन्त्री ओलीं कासा ख्यःया विकासया निंतिं सरकार न्ह्याबलें कासामित नापं दइ धयादिल। वय्कलं एनपिएलं नेपाःया क्रिकेटय् न्हूगु आयाम हइगु आशा नं व्यक्त यानादिल ।

“क्रिकेट झीगु पुस्ताया म्हगस व गौरवया विषय नं खः। थ्व लिगपाखें नेपाःया क्रिकेटय् न्हूगु आयाम दयेके फयेमाः”, प्रधानमन्त्री ओलीं धयादिल, “सरकार छिकपिनिगु हे नापं दु। जि सरकारय् च्वनाबलय् वा मच्वनाबलय् न्ह्याबलें नं जिगु चिउता व ध्यान थुखेपाखे दयाच्वनी। ब्वति काःपिं कासामित सकसितं त्याकेफयेमाः धैगु भिंतुना बिइ।”

वय्कलं थुगु कासापाखें युवा प्रतिभायात पितब्वयेगु व नेपाःमितय्सं अवसर चूलाःसा छुं यानाः क्यनी धैगु मान्यतायात नीस्वनेमाः धैगु सुवाःतकं बियादिल।

Categorized in कासा