जनसङ्ख्या व विकासयात सन्तुलित ढङ्गं नापनापं यंकेत माःगु नीतिगत व्यवस्थाया निंतिं मंकाः अवधारणा दयेकेगु तातुनां थ्व हे मङ्सिर १२ निसें १५ गतेतक येँय् जनसङ्ख्या व विकाससम्बन्धी खुक्वःगु अन्तर्राष्ट्रिय सम्मेलन जुइत्यंगु दु।

त्रिभुवन विश्वविद्यालय, जनसङ्ख्या अध्ययन केन्द्रीय विभागं ग्वसाः ग्वःगु थुगु सम्मेलनय् चीन, अमेरिका, युरोप, अष्ट्रेलिया, दक्षिणपूर्व एसिया व एसियाली लागाया ३५ स्वयां अप्वः देय्या न्यासः स्वयां अप्वः जनसङ्ख्या व विकास ख्यःया प्राध्यापक, नीति निर्माता, अनुसन्धानकर्ता, विद्यार्थी व विषयविज्ञ तय्सं ब्वति काइ। सम्मेलनया उलेज्या प्रधानमन्त्री केपी शर्मा ओलीं याइगु ज्याझ्वः दु।सम्मेलनय् थी थी १७ गू विषय व ख्यलय् केन्द्रित जुयाः सहलह जुइ।

लिपांगु इलय् जन्मदर कुहाँवयाच्वंगु झ्वलय् जनसङ्ख्याया व्यवस्थापन गथे यानाः यायेगु धइगु बारे विशेष सहलह जुइगु न्ह्यथंगु दु। “थुगु अवस्थाय् जनसङ्ख्या व विकास दथुइ गथे यानाः तादम्यता दयेके फइ, थुकिया निंतिं नीति निर्मातां छु यायेमाः, विश्वविद्यालयय् गजाःगु पाठ्यक्रम तयेमाः धैगु बारे सहलह जुइ”, विभागया सहप्राध्यापक नापं नेपाल जनसङ्ख्या सङ्घया नायः डा पदम खतिवडां धयादिगु दु।

सम्मेलनय् नेपाःपाखें प्रजननदर, जन्मदर व बसाइँ सराइलिसें जनसाङ्खिक ह्यूपाःया बारे विशेष न्ह्ब्वयेगु जुइ। पार्किन्सनलिसें पुनी मखूगु ल्वय्या विषयय् नं सम्मेलनय् सहलह जुइगु ज्याया धलः दु। नेपालय् लैङ्गिक समानता, समावेशिता व सामाजिक सुरक्षालिसें संवैधानिक हकया छ्यलाबुलाया अवस्थाया बारे नं सहलह जुइ।

सम्मेलनय् विकास व जनसङ्ख्याया ख्यलय् नेपालं ताःलाकूगु उपलब्धि, फयाच्वनेमाःगु व उकिया सामाना यायेत अन्तर्राष्ट्रिय अनुभव कालबिल जुइ। जनसङ्ख्या व विकासया ख्यलय् गथे जुयाः ह्यूपाः वयाच्वन धैगुलिइ सहलह जुइगु सङ्घया नायः डा खतिवडां धयादिल। एसिया प्यासेफिक लागाय् जूगु जनसाङ्खिक ह्यूपाः, बसाइँसराइ व औषत आयु अप्वः जूबलय् लाःगु पारिवारिक असर व प्रभाव नापं विकास नीति, योजनां हिलावंगु जनसङ्ख्यापाखें फाइदा कायेगु व कय्च्यायेगु बारे सहलह केन्द्रित जुइगु त्रिवि, जनसङ्ख्या अध्ययन केन्द्रीय विभागया प्रमुख नापं प्रा डा योगेन्द्र गुरुङं धयादीगु दु।

सम्मेलनया लिच्वलं वइगु इलय् जनसङ्ख्या नीति निर्माण यायेत अःपुइकिइ धकाः भलसा कयाच्वंगु वय्कःया धापू दु। जनसङ्ख्या व विकासयात स्वाकेगु मू तातुनाकथं सन् २०१० निसें सम्मेलन जुयावयाच्वंगु खः । न्हापांगु सम्मेलन भारतया न्हू दिल्ली, निक्वःगु थाइल्याण्डया बैंकक, स्वक्वःगु मलेसियाया क्वालालम्पुर, प्यक्वःगु चीनया साङ्घाइ व न्याक्वःगु इन्डोनेसियाया जाकर्ताय् जूगु खः। (रासस)

Categorized in राष्ट्रिय