यल महानगरपालिकाया प्रमुख चिरीबाबु महर्जनं ‘स्मार्ट सिटी’ जुइत हिंसा मदुगु समाज जुइ हे माः धयादिइगु दु।

यल महानगरपालिकापाखें थौं थन ग्वसाः ग्वःगु अन्तर्राष्ट्रिय लैङ्गिक हिंसा विरुद्धया १६ न्हिया अभियान न्ह्यागु समारोहलय् वय्कलं सभ्य, सुसंस्कृत व आधुनिक समाजया निंतिं हिंसा मजुइमाः धइगु खँय् बः बियादिल। “जिम्मेवार पदय् च्वंपिन्सं जक हिंसायात पाःयाना यंकेफइमखु, फुक्कं मिलेजुया वंसा जक यायेफइ।

आः हिंसाया ल्याः व घटना म्ह्वः याये माःगु दु”, महानगर प्रमुख महर्जनं धयादिल। वयकलं हिंसा मदुगु समाजया दयेकेगुलि बः बिसें यलया विकास व समृद्धिया निंतिं ‘पाटन सिटी डज नट स्लिप’ योजना न्ह्याकावनेगु धयादिल।

महानगर उपप्रमुख मञ्जली शाक्यं ल्वापु सहयायेगु व सहयायेगु प्रवृत्तियात बःबिइगु धइगु हे सामन्ती प्रथायात बःबिइगु जुगुलिं सकसितं सचेत जुया हिंसा पाःयानावनेगु ज्याय् ग्वाहालि यायेत इनाप यानादिल। यलया प्रमुख जिल्ला अधिकारी रमेश ढकालं स्वसः व ६५ न्हु हे मिसा हिंसा विरुद्धय् न्ह्यावनेमाः धका धयादिल। वय्कलं हिंसा जुइधुंका उपचारया निंतिं लँ मावनेगु स्वयां हिंसा हे मजुइकेत सचेतताया लँपुइ वनेमाःगु खँ न्ह्यथनादिल।

यलया प्रहरी प्रमुख वरिष्ठ प्रहरी उपरीक्षक शेखर खनालं लैङ्गिक हिंसाविरुद्ध १६ न्हिया अभियान साङ्केतिक ज्याझ्वः जक जूगु व न्हियाहिथं हिंसाविरुद्ध तदारुकतां न्ह्यांवनेमाः धयादिल। “जिल्ला प्रहरीइ मिसा हिंसाविरुद्ध ब्यागलं सेल नीस्वनातःगु दु। मिसा, मचात व ज्याथपिं नागरिकतय्त विशेष प्राथमिकता बिया उजुरी कायेगु व समाधान यायेगु यानावयाच्वनागु दु”, वय्कलं धयादिल।

मिसा विकास शाखा प्रमुख शोभा खरेलं नोभेम्बर २५ निसें डिसेम्बर १० तक न्ह्याइगु थ्व अभियानयात प्रभावकारी दयेकेत माःकथं ग्वाहालिया निंतिं सकसित इनाप यानादिल ।(रासस)

Categorized in राष्ट्रिय