चन्द्रागिरि नगरपालिकां थःगु लागाया शिक्षित ल्याम्ह्य तय्त ‘डिजिटल’ सीप बियाः देय् दुने हे सुचं प्रविधिया लागाय् ज्या चूलाकेगु ह्वताः दयेका बिइगु नीति कयेच्याःगु दु।

थ्व हे नीतियात ज्याखँय् हयेत नगरपालिकां न्हापांगु खुसिइ सोमबाःनिसें डिजिटल तालिम न्ह्याकूगु दु। नगरपालिकां रोजगार सेवा केन्द्रनाप जानां न्हापांगु खुसिइ न्ह्याकूगु थूगु तालिमय् ५०म्ह ल्यासेल्याय्म्हतसें थःत मिलेजूगु ई लाका न्हि स्वघौ सुचं प्रविधिया थी थी आयाम (मोडल) या बारे ज्ञां काइगु जुइ।

‘स्किल ल्याब’या ग्वाहालिइ न्ह्यानाच्वंगु थुगु तालिमय् नगरया १५ गू हे वडाया ५० म्ह ल्यासेल्याय्म्हतसें ब्वति कयाच्वंगु दु। तालिम लिपा थ्व हे संस्थां इमित लजगाःया निंतिं विदेशी संस्थात नाप समन्वय यानाबीगु धाःगु दु। सीप व लजगाःयात स्वाइगु थुगु तालिमलिपा ब्वतिकापिंसं देशय् हे च्वना सूचं प्रविधिया ज्या याये फइगु धाःगु दु।

लिपांगु ई नगरपालिकां ल्यासेल्याय्म्हतय्त थी थी लागाय् देय् दुने हे लजगाःया ह्वताः चुलाके फइगु लकस दयेकेत माःगु सीपमूलक तालिम, प्रशिक्षण व मेमेगु ज्याझ्वःयात न्हापं थाय् बियावयाच्वंगु दु। सोमबाः न्ह्यागु तालिमया उलेज्या यानादिसें चन्द्रागिरि नगरपालिकाया प्रमुख घनश्याम गिरीं नगरपालिकाया सेवायात प्रविधिमैत्री दयेकाः यंकेगु नगरपालिकाया नीति दूगु खँ धयादिल।

वय्कलं धयादिल, “देय् दुने हे लजगाःया ह्वताः चुलाकेया निंतिं नगरपालिकां युवातय्त केन्द्रय् तयाः थी थी ज्या न्ह्याकेया नापं प्रशिक्षण व तालिम बियाच्वंगु दु।” ज्याझ्वलय् प्रमुख प्रशासकीय अधिकृत हेमराज अर्यालं नगरपालिकां न्ह्याकाच्वंगु रोजगारमुखी तालिमलिपाया पलाः न्ह्याकेत न्हापांगु कुतः कथं डिजिटल तालिम न्ह्याकाःगु व थुकीं सीप व लजगाःयात स्वाइ धयादिल।

वय्कलं धयादिल, “डिजिटल तालिमलिपा देय् दुने हे च्वना ज्या यायेफइगु जुयाः नगरपालिकां थुजाःगु तालिमयात यक्वः मू बियाः न्ह्यने हःगु खः। सुचं प्रविधिया लागाय् दक्ष जनशक्ति म्ह्वः जुयाच्वंगुयात तालिमं पूवंकेगुलिइ ग्वाहालि याइ। डिजिटल तालिमलिपा ब्वतिकाःपिन्त रोजगारदाता कंपनीनाप समन्वय यानाबिइगु जुया थुकिया मू यक्वः दु।”

ज्याझ्वलय् नगरपालिकाया उपप्रमुख वसन्ती श्रेष्ठ, प्रवक्ता कृष्णप्रसाद खड्गी, रोजगार सेवा केन्द्रया प्रमुख पुष्पराज शर्मां तालिमया महत्वबारे नुगः खँ तयादीगु खः। (रासस)

Categorized in राष्ट्रिय