जनतायात सुलभ भावं स्वास्थ्य सेवा बीगु योजना दु : कृष्णमान डंगोल
लहनान्युज | कछलागा द्धादशी ११४५, मंसीर १२ बुधवाः
किपु नगरपालिकाय् वइगु मंसिर १६ गते मेयर पदया निंतिं जुइत्यंगु उपनिर्वाचनयात कयाः नेपाली कांग्रेसपाखे उम्मेवारी बियादीम्ह कृष्णमान डंगोल लिसे किपुया विकास निर्माण व भावी योजना बारे जूगु खँल्हाबल्हा ।
किपु नगरपालिकाय् छिगु उम्मेदवारी छाय् ?
० किपु नगरपालिकाय् जिगु उम्मेवारी मुख्य रुपं किपु नगरपालिकाया विकासया नितिं खः । विकासया ज्या लँ जक दय्केगु मखु । पाटी पौवा जक दय्केगु नं मखु । थन त्वाःत्वालय् दुगु संस्कृति सम्पदायात ल्यंकेगु निंतिं नं खः । मेता थःगु क्षेत्रया लिसे देश विकास याय्त शिक्षाया तःधंगु महत्व दु । उकियात आपूल हिउपाः हय्गु नं खः । अथे ला २०४६ साल लिपा शिक्षाय् यक्व विकास जुइधुंकूगु दु । उकिया लिसे स्वास्थ्य क्षेत्रया विकास नं खः । थौंकन्हय् निजी स्वास्थ्य सेवा तसकं थिकेक ध्यबा पुलाः काये मालाच्वंगु दु । ध्यबा मदुपिसं निजी स्वास्थ्य सेवा कायेत थाकुयाच्वंगु दु । अथेजुयाः जिं स्वास्थ्य क्षेत्रय् नं आमुल हिउपाः हय्गु खँयात मू एजेन्डाया रुपय् कयागु दु । उकिया निंतिं किपू नगर हस्पिटल दय्काः किपु नगरपालिकां हे हस्पिटल सञ्चालन याय्गु योजना दु । अथे धइगु सरकारी रेटं हे स्वास्थ्य सेवा बीगु लक्ष्य कयागु दु ।
किपुली न्हापा हे विष्णुदेवी अस्पताल दु ? हाकनं मेगु अस्पताल दय्केमाःगु आवश्यकता छाय् जुल ?
० मेगु अस्पताल दय्केगु मखु । खय्त ला थन छगू किर्तिपुर हस्पिटल दु । कीर्तिपुर हस्पिटल किपु नगरपालिकाया ५२ रोपनी जग्गाय् छगू संस्थां सञ्चालन यानाच्वंगु दु । अन प्यसः निसें न्यासः तक पुलाः स्वास्थ्य जाँच याय्माःगु अवस्था दु । लिसे अन थीथी सुविधा छ्यलेमाल धाःसा प्राइभेट हस्पिटल थें थिकेक ध्यबा पुला स्वास्थ्य सेवा काय् मालाच्वंगु दु । थथे थिकेक सेवा काय् मालाच्वंगु खँयात मनन यानाः थ्व स्वयां न्ह्यः नेपाली कांग्रेसपाखे निर्वाचित जुयादीम्ह मदुम्ह मेयर राजकुमार नकर्मीं निर्वाचनया झ्वलय् ५० प्रतिशत छुट बीगु घोषणा यानादीगु खः । लिसे वय्कः निर्वाचित जुइधुंकाः उगु योजना लागू नं यानादीगु खः । गुगु सेवा आः तक नं न्ह्यानाच्वंगु दु । अले छिं नकतिनि धयादिल विष्णुदेवी हस्पिटल गुगु हस्पिटल १५ बेडया जुइमाःगु खः । २०५६ सालय् कांग्रेसं निर्वाचित जुयादीम्ह तीर्थराम डंगोल १५ बेडया हस्पिटल दय्केगु धकाः स्वीकृति कयाहःगु खः । उगु हस्पिटल थौंकन्हय् लावारिस जुयाच्वंगु दु । थौंकन्हय् विष्णुदेवी अस्पताल प्राथमिक उपचार जक जुयाच्वंगु दु । वहे हस्पिटलयात आः १५ बेडया सुविधा सम्पन्न हस्पिटल कथं रुपान्तरण याय्गु खः । उकियात कीर्तिपुर नगर हस्पिटल कथं नामांकरण याय्गु खः । मेता यदि जि निर्वाचित जुल धाःसा निर्वाचित जूगु निलाया दुने २४ प्याघौंया आकस्मिक सेवा बीगु जुइ ।
किपु क्षेत्रय् विकास निर्माणय् छिगु योजना छु दु ?
किपु क्षेत्रया विकास निर्माणया नितिं जिं छगू नारा बियागु दु, ‘शिक्षा, स्वास्थ्य व रोजगारी’ । नापनापं भौतिक विकासय् गनं लँ मवंथाय् लँ थ्यंकेमाल । दछियंकं हे न्हिथं त्वनेगु लःया व्यवस्था याय्गु । खय्त ला २०४६ साल लिपा नेपाली कांग्रेसं लःया नितिं आपालं ज्या याःगु दु । मेलम्चीया खँ ल्हायय्गु खःसा अन्तरिम कालय् प्रधानमन्त्री जुयादिम्ह प्रधानमन्त्री कृष्णप्रसाद भट्टराईया परिकल्पना खः मेलम्चीया लः स्वनिगःया जनतायात त्वंकेगु । अथे खःसां नं वर्षाया इलय् निला स्वला लःया समस्या जुयाच्वंगु दु । अज्याःगु समस्या मदय्केगु नितिं किपुया ४ नम्बर वडाय् च्वंगु सिमझवाः हिति, नौमले दुघपोखरी अन लःया स्रोत दु । अनया लःयात व्यवस्थित यानाः किपुया फुक्कं वडाय् ३६५ न्हिं लःया अभाव मजुइ कथं ज्या याय्गु योजना दु ।
आःया कार्यकाल धइगु निदँ जक खः । निदँया दुने गुलि ज्या याय्फइगु सम्भावना खंकादिया ?
० निश्चित रुपं निदँया कार्यकाल चीहाकःगु खः । न्यादँ हे ज्या याय्दुगु खःसा ९० प्रतिशत ज्या पूवंकेगु खः । तर निदँया दुने पूवंके फइगु ज्या नं दु । पूवंकेगु फइगु ज्यायात पूवंकेगु जुइसा मेगु पूवंके मफइगु ज्यायात न्ह्याकेगु जुइ । अले न्ह्याय्धुंकूगु ज्या मेगु चुनावय् निर्वाचित जूपित अपुइ । लिपा वइपिंत नं अपुइमा धकाः हे मास्टर प्लान दय्काः ज्या याय्गु जुइ ।
थौंकन्हय् स्वतन्त्र उम्मेदवारया ह्युइम वयाच्वंगु दु । थज्याःगु इलय् छि निर्वाचित जुइगु आधार छु दु ?
वंगु चुनावय् छम्ह निम्ह स्वतन्त्र उम्मेदवार त्याय्वं आः नं त्याइ धइगु आधार मदु । छम्ह निम्ह त्याय्वं गुगु ज्या यानाच्वन। आः न्हू वइपिसं उकथं ज्या याय्फइगु सम्भावना नं मदु । मेता खँ किपु नगर धइगु बजेट सिमित दुगु नगर खः। येँ महानगरया बजेटयात कायेगु खःसा २६ अर्ब धइथें बजेट दु। अन ला न्ह्याग्गु नं याय्फइ । किपु नगरय् ला १ अर्ब २५ करोड जक बजेट दु । मेता खँ येँ महानगरपालिकाय् न्हापा पीएल सिं निसें विकास निर्माणया आपालं ज्या जुइधुंकूगु दु। येँ मनपाय् गुलिखें बजेट ला खर्च याय्थाय् तकं मदय्धुंकूगु अवस्था खः । तर थन किपु नगरपालिकाय् बजेट सीमित ज्या याय्माःगु यक्व दु। अथे जुयाः किपु नगरपालिकाया बजेटं जक ज्या याय्गु सम्भावना मदुगुलिं प्रदेश व केन्द्रया बजेट हयाः जिं ज्या याय्फइगु जूगुलिं जि निर्वाचित जुइ धइगु आधार खः। छाय् धाःसा केन्द्र व प्रदेशया बजेट हय्त पार्टीगत आधार दय्माः। आःया केन्द्र सरकारयात स्वय्गु खःसा एमाले व कांग्रेसया सरकार खः। किपु लागाय् नेपाली कांग्रेसं त्याकावःपिं वडा अध्यक्षत दु । मेता बागमती प्रदेशया मुख्यमन्त्री नेपाली कांग्रेसया हे खः। यदि फरक धारया मनूत निर्वाचित जुल धाःसा किपुया जनता हाकनं छकः विकास निर्माणपाखे लिउने लाइ । मेता खँ किपुली ९९ प्रतिशत जनप्रतिनिधि नेपाली कांग्रेसया दु आः मेयर नं कांग्रेसया हे जुल धाःसा ज्या याय्त तकसं अपुइ । मेता स्वास्थ्य व पर्यटन सम्बन्धी खँ ल्हाय्गु खःसा स्वास्थ्य मन्त्री, पर्यटन मन्त्री नेपाली कांग्रेसया हे दु । उकथं हे खेलकूद मन्त्री नं जि सतिपिं पासापिं हे खः। वय्कःपिं पाखे नं बजेट हयाः जिं प्रतिबद्धता प्वंकूगु ज्या पूवंकेत यक्व अपुइ। उकिया लिसे थ्व हे क्षेत्र निर्वाचित जूपिं राजेन्द्रकुमार केसी, प्रदेश सांसद जुयादीम्ह पुकार महर्जन दुगुलिं जितः ज्या याय्त तसकं अपुइ। अथेजुयाः नेपाली कांग्रेसयात त्याकेमाः।
किपुया पुलांगु वस्तीइ आपालं जग्गा धनीयाके लालपूर्जा मदु । थ्व समस्या समाधानया नितिं छु यानादी ?
थ्व सम्बन्धय् छु धाय्माःगु आवश्यकता दु। अथे ला २०५६ सालय् तक किपुया छम्ह हे जनतायाके लालपूर्जा मदु। अले उगु निर्वाचनया झ्वलय् लालपूर्जा छगू तःधंगु एजेन्डा जुल । सछिगू ज्या याय्गु स्वयां छगू गतिलाःगु ज्या याय्गु। थ्व हे कथं यदि कांग्रेसपाखे सांसद निर्वाचित जुल धाःसा लालपूर्जाया समस्या समाधान याय्गु प्रतिबद्धता उगु इलय् प्वंकूगु खः। वयां लिपा हनेबहःम्ह तीर्थराम डंगोल निर्वाचित जुइधुंकाः छगू आयोग नीस्वनाः आपालंसित लालपूर्जा बीगु ज्या जुइ धुंकूगु दु। आः नं छुं छुं लालपूर्जा इनेगु ल्यँ दनि । यदि किपुली जि निर्वाचित जुल धाःसा स्वंगुलिं तहलय् नेपाली कांग्रेसया सरकार दइगु जुयाः समस्या ज्यंकेत जितः अपुइ धइगु विश्वास दु।
अन्तय् छिगू निर्वाचन क्षेत्रया जनतायात छु धयादी ?
० नेपाली कांग्रेसं किपु नगरपालिकाया विकास याय्त तःधंगु ज्या यानाच्वंगु दु। २०६९ लिपा निरन्तर स्वक्वः तक निर्वाचित जुयादीम्ह राजेन्द्रकुमार केसी, निक्वः तक त्याकादीम्ह पुकार महर्जनपिसं संस्कृति ल्यंकेत, देगः दय्केत आपालं बजेट हयाः विकास निर्माणय् योगदान बियाच्वंगु कारणं यानाः थ्वहे वइगु मंसिर १६ निर्वाचनय् जिं सिमा चिं लय् छाप तयाः अत्याधिक मत बियाः त्याकादीत इनाप यानाच्वना।
