प्रधानमन्त्री केपी शर्मा ओलीलिसे राष्ट्रिय फोटो पत्रकार पुचः (एनएफपिजे) नेपाःया नवनिर्वाचित कार्यसमितिं थौं प्रधानमन्त्री निवास बालुवाटारय् नाप लानाः वय्कःयात फोटो पत्रकारतय्गु हकहितया निंतिं गुगू बुँदाया ध्यानाकर्षण पौ लःल्हाःगु दु।

संस्थाया नायः प्रदीपराज वन्त नेतृत्वया टोलीं लःल्हाःगु उगु ध्यानाकर्षण पौ नेपालय् थी थी सञ्चारगृहय् फोटो पत्रकारिता याइपिं फोटो पत्रकारतय्गु हकहितया निंतिं सरकारया पाखें माःगु ग्वाहालि व फोटो सङ्ग्रहालयया निंतिं कुतः याकादीत प्रधानमन्त्री ओलीयात ध्यानाकर्षण याःगु खः।

अथे हे ‘फोटो पत्रकारितापाखें जीविकोपार्जन याइपिं फुक्कं फोटो पत्रकारतय्गु बीमा नापं स्वास्थ्य सुरक्षा, फोटो पत्रकार तय्त व्यावसायिक तालिम बिइत दँय् दसं बजेट व्यवस्थापन, ई कथं ‘अपडेट’ जुयाच्वनेत फोटो पत्रकार तय्त माःगु क्यामेरा न्यायेत सहुलियत दरं त्यासा उपलब्ध याकेत कुतः यानादीत तकं ध्यानाकर्षण याःगु दु।

उगु झ्वलय् प्रधानमन्त्री ओलीं नवनिर्वाचित कार्यसमितियात भिंतुना बिसें पत्रकारिताय् फोटोया महत्व अप्वः जुइगुलिं फोटो पत्रकार तय्गु निंतिं देय्पाखें माःगु ग्वाहालि याइगु भलसा बियादिल।

Categorized in राष्ट्रिय