मिसन ८४ या निंतिं जिं छपा अप्पा तनेगु जुइ —लक्ष्मीरत्न तुलाधर
लहनान्युज | कछलागा त्रयोदशी ११४५, मंसीर १३ बिहीवाः
वइगु मंसिर १६ गते जुइत्यंगु स्थानीय उपनिर्वाचनया नितिं नेकपा (एमाले) पाखे येँ महानगरपालिका वडा नं. १६ पाखे वडा अध्यक्षय् उम्मेदवार बियादीम्ह लक्ष्मीरत्न तुलाधर लिसे उपनिर्वाचनयात कयाः जूगु खँल्हाबल्हा न्ह्यब्वयाच्वना ।
वइगु मंसिर १६ जुइगु उपनिर्वाचनय् वडा अध्यक्षय् त्याइ धकाः गुलि तक आशा यानादिया ?
जिगु ज्याकुथी वयाः निर्वाचनया विषययात कयाः गुगु अन्र्तवार्ता कयादिल । दकलय् न्हापां उकिया नितिं छिकपिंत सुभाय् देछाया । जि थ्व उपनिर्वाचनय् दनेस्वयां न्ह्यवंनिसें सामाजिक क्षेत्रय् ज्या याना च्वनागु खः । जि सामाजिक ज्या यानागु ल्याखं जुइमाः थुगुसी जिगु पक्षय् जनलहर वयाच्वंगु महसुस याना । लिसे थनया दाजुकिपा तताकेहेँपिसं नं जित साथ बिउगु जिं ताः उकथं हे थकालीपिसं जितः आर्शिवाद बिउथें जिं ताय्का च्वना ।
अथे ला छि वंगु स्थानीय तह निर्वाचनय् नं निगूगु थासय् लानादीगु खः । सायद उगु इलय् पार्टी विभाजित जूगुलिं छि निर्वाचित जुइ मफुत । थुगुसी अवस्था गथे दु ?
न्हापा नं चुनावय् वनागु इलय् जिगु सामाजिक सक्रियता आः थें खः । तर गथे जुइ धाःसा चुनावय् वनेबलय् नकतिनि विभाजित जुयावःगु शक्ति चुनावया इलय् न्हापाया हे आंकादायात बियाच्वंगु अले नागरिक नं अलमल जुयाच्वंगु ई । लिसे उगु इलय् प्रदेशया छम्ह नांजाम्ह नेतृत्वं नं पार्टीयात ग्वाहालि मयाःगुलिं यानाः जि म्हो मत जक लिउने लाःगु खः । अबलय् नं जिं धाय्गु खःसा प्राविधिक रुपं जि बूगु मखु। छुं मतया ल्याखँ जक जि बूगु खः ।
आःया कार्यकाल धइगु निदँया जक कार्यकाल खः । थ्व निदँया दुने गुलि ज्या याय्फइगु ताय्कादिया ?
स्थानीय सरकार धइगु थःगु छेँय् न्ह्यःने च्वंगु सरकार धाइ । थ्व निदँया कार्यकाल धइगु वास्तवय् निदँया कार्यकाल मखु। जिगु पार्टीं नालाच्वंगु ज्याझ्वः नीति, जिगु पार्टीं ‘समृद्ध नेपाल, सुखी नेपाली’ दय्केगु धइगु गुगु नारा बियाच्वंगु दु। अथे मेता खँ जिगु पार्टीं मिसन ८४ धकाः गुगु नारा बियाच्वंगु दु उकिं जिं छपा अप्पा तनेगु जुइ ।
न्हापाया वडा अध्यक्ष यानाच्वंगु न्ह्याकाच्वंगु ज्या थौंकन्हय् थातिं लानाच्वंगु दु। उकियात गुकथं कयादी ?
वय्कलं यानादीगु बांलाःगु ज्यायात जिं नुगः ह्वय्काः प्रशंसा याय्। वय्कलं न्ह्याकादीगु बांलाःगु ज्या गनं दिनाच्वंगु दुसा उकियात पूवंकेगु जुइ। जि निर्वाचित जुल धाय् वं वय्कलं न्ह्याकूगु बांलागु ज्यायात मयाय्गु धइगु जुइ मखु।
छिगू वडाया मू समस्या छु दु ?
थनया समस्या छु दु धकाः मखु। अज्याःगु समस्या व्यवस्थापन गुकथं याय्गु धइगु मू खँ खः । जितः ताः थनया फुक्कं कथंया समस्या व्यवस्थापन याय्त जि सफल जुइ । समस्या धइगु वयां तुं च्वनी मू खँ वयात गुकथं व्यवस्थापन याय्गु धइगु खः । नेतृत्वया दायित्व नं थ्वहे खः ।
थ्व चुनावय् जनतां छितः भोट बीगु छाय् ?
जि राजनीतिक मनू जक मखु, सामाजिक मनू नं खः । जिं थनया क्लब संघसंस्था लिसे नं स्वाः । उकथं हे ज्येष्ठ नागरिकया संस्था लिसे नं स्वानाच्वंगु दु। उथकं हे विपत्त व्यवस्थापन नापं नं स्वानाच्वंगु दु। थनया जनताया छुं नं कथंया समस्या जुल धाःसा जिपिं सक्रिय जुयाः ज्या यानाच्वनागु दु। अथेजुयाः थुकथं सक्रिय जुयाच्वनाम्ह मनूयात भोट छाय् बीगु धकाः मखु भोट छाय् मबीगु धकाः न्ह्यसः न्यनेमाःगु खः ।
अन्तय् छिगू निर्वाचित क्षेत्रया जनतायात छु धयादी ?
अन्तय् जिं छु धाय्धाःसा वइगु मंसिर १६ गते जितः सूर्य मतदान यानाः त्यकादिल धाःसा वडां जुइगु सेवा छेँय् छेँय् थ्यंकेगु जुइ । युवातय्त स्वरोजगारय् स्वाय्गु जुइ । मिसापिंत सम्मान सहित सशक्तिकरण यानाः आयमूलक उद्योगय् स्वाय्गु जुइ । ज्येष्ठ नागरिकया नितिं दिवा आश्रम दय्केगु जुइ । विकास निर्माणयात सुशासन लिसे स्वानाः हरेक त्वालय् दुगु उपभोक्ता समिति स्थानीय नागरिक लिसे सहलह यानाः वय्कःपिनिगु जिम्मेवारी ज्या न्ह्याकेगु जुइ।
