स्वास्थ्य नापं जनसङ्ख्यामन्त्री प्रदीप पौडेलं सुस्मा कोइराला मेमोरियल अस्पतालयात जलन अस्पतालया कथं विकास यायेत्यंगु न्ह्यथनादीगु दु।

येँया शङ्खरापुर नगरपालिकाया साँखुइ च्वंगु अस्पतालया संस्थापक देशीय निर्देशक हाइन स्टालयात बिदाइ नापं न्हूम्ह देशीय निर्देशक अल्बर्ट बेन्जिनयात लसकुस यायेत बिहीबाः ग्वसाः ग्वःगु ज्याझ्वलय् मन्त्री पौडेलं सरकारं लिपांगु इलय् जलन उपचारयात प्राथमिकता बियाः ज्या न्ह्यानाच्वंगु खँ कनादीगु खः।

वय्कलं धयादिल, “सुस्मा कोइराला मेमोरियल अस्पताल जलन उपचारया निंतिं छगू विशिष्टिकृत अस्पताल खः, सरकारं निकतिनि थें हे देय्न्यंकया च्यागू अस्पतालय् जलन उपचार यायेफइगु अस्पताल कथं घोषणा याःगु खः, थुकिइ सुस्मा कोइराला अस्पतालयात तकं स्वानाः न्ह्याःवने फइ।” स्वास्थ्यमन्त्री पौडेलं जर्मनतय्गु ग्वाहालिं सुस्मा कोइराला मेमोरियल ट्रष्टपाखें न्ह्याकाःवयाच्वंगु उगु अस्पतालं मेमेगु अस्पतालय् ज्या यानाच्वंपिं चिकित्सक व परिचारिकातय्त जलन उपचारसम्बन्धी तालिम बिइफइगु धयादीगु खः।

जलन उपचारया नेतृत्व सुस्मा कोइराला अस्पतालं याये फइगु वय्कःया धापू खः। ज्याझ्वलय् पूर्व उपप्रधानमन्त्री सुजाता कोइरालां न्हापांगु इलय् दुर्गम थासय् अस्पताल चायेकेत तसकं समस्या फयेमाःगु खँ कनादिल । न्हापा देय्न्यंक हे जलनया उपचार मदयाः उगु अस्पताल नीस्वंगु वय्कःया धापू खः।

जर्मनीया ग्वाहालिं न्ह्यानाच्वंगु उगु अस्पतालं आःतक १५ द्वः ३ सः व ७५ म्हसिगु सित्तिकं वासः तकं यायेधुंकूगु दु। च्याम्ह डाक्टर नापं कर्मचारीतपाखें न्ह्याःगु उगु अस्पतालय् थौंकन्हय् १०० म्ह कर्मचारीत ज्या यानाच्वंगु अस्पतालया प्रशासन प्रमुख प्रफुल्ल शर्मां धयादिल।

Categorized in राष्ट्रिय